रसुवा बाढीबाट प्रभावितहरूको खोज र उद्धार सुरू भइसकेको छ– बालेन शाह

काठमाडौं । रसुवामा आएको बाढीपछि उद्धार तथा राहतका लागि नेपाली सेना, सशस्त्र प्रहरी बल र नेपाल प्रहरी परिचालन गरिएको प्रधानमन्त्री बालेन शाहले बताएका छन् । 

Watch On

प्रधानमन्त्री शाहले सामाजिक सञ्जालमार्फत प्रभावित क्षेत्रमा उद्धार तथा राहतका लागि अन्य जिल्लाबाट समेत थप सुरक्षाकर्मी पठाइसकिएको जानकारी दिएका छन् ।

विपद् व्यवस्थापन प्राधिकरणलाई सक्रिय बनाइएको र मेडिकल टिम, स्काउट तथा रेडक्रससँग समन्वय गरेर आवश्यक कदम चाल्न निर्देशन दिइएको उनले बताएका छन् । प्रभावित क्षेत्रमा थप एम्बुलेन्स र मेडिकल जनशक्ति पठाउने प्रक्रिया अघि बढाइएको पनि शाहले जानकारी दिएका छन् ।

तल्लो तटीय क्षेत्रका बासिन्दालाई तत्काल सुरक्षित स्थानमा सार्न सम्बन्धित प्रमुख जिल्ला अधिकारीलाई निर्देशन दिइएको उनले बताएका छन् । त्यसका लागि एसएमएस र फोनमार्फत सूचना दिई सुरक्षित स्थानमा जान सचेत गराइएको छ ।

सम्भावित उद्धार तथा राहतका लागि सबै हेलिकप्टरलाई तयारी अवस्थामा राख्न निर्देशन दिइएको छ । निजी हेलिकप्टर कम्पनीलाई समेत हेलिकप्टर तयारी अवस्थामा राख्न भनिएको शाहले बताएका छन् ।

बाढीपछि आगामी आवश्यक कदमबारे निर्णय गर्न उच्चस्तरीय बैठक बोलाइएको उनले जानकारी दिएका छन् ।

प्रधानमन्त्री शाहले सबैलाई सुरक्षित स्थानमा बस्न आग्रह गर्दै आफन्तसँग सम्पर्क हुन नसके उद्धार टोलीका आधिकारिक अपडेट कुर्न अनुरोध गरेका छन् । थप जानकारी तथा राहतसम्बन्धी जानकारीका लागि १२३४ नम्बरमा सम्पर्क गर्न सकिने उनले बताएका छन् ।