उद्धारको प्रतीक्षामा रहेका प्रत्येक नागरिकसम्म राज्य पुग्नेछ : बालेन शाह

काठमाडौं । प्रधानमन्त्री बालेन शाहले विपद्बाट प्रभावित प्रत्येक परिवारको साथमा राज्य रहेको भन्दै उद्धारको प्रतीक्षामा रहेका प्रत्येक नागरिकसम्म सरकार पुग्ने बताएका छन् ।

Watch On

रक्षाबन्धनको अवसरमा सामाजिक सञ्जालमार्फत प्रधानमन्त्री शाहले अहिले सरकारको सम्पूर्ण ध्यान प्रभावित नागरिकमै केन्द्रित रहेको बताएका हुन् ।

‘यस कठिन घडीमा विपद्बाट प्रभावित प्रत्येक परिवारको साथमा राज्य छ। उद्धारको प्रतीक्षामा रहेका प्रत्येक नागरिकसम्म राज्य पुग्नेछ,’ प्रधानमन्त्री शाहले भनेका छन् ।

उनका अनुसार बाढी प्रभावित क्षेत्रमा खोज तथा उद्धारका लागि नेपाल प्रहरी, नेपाली सेना र सशस्त्र प्रहरी गरी १५ हजार ४३१ सुरक्षाकर्मी परिचालन गरिएको छ ।

हालसम्म चार हजार ४५१ जनाको उद्धार गरिएको उनले बताएका छन् । उद्धार गरिएकामध्ये जलविद्युत् आयोजनाका सुरुङबाट १९१ जना तथा आजको हवाई उद्धारबाट ५१७ जना छन् ।

उद्धारका लागि नेपाली सेना तथा निजी क्षेत्रका गरी १६ वटा हेलिकप्टर परिचालन गरिएको छ । धुन्चे, त्रिशूली, टिमुरे र स्याफ्रुबेँसीलगायत क्षेत्रमा निरन्तर हवाई उडान सञ्चालन भइरहेको र हालसम्म ९९ वटा उडान भएको प्रधानमन्त्री शाहले बताएका छन् ।

बाढी प्रभावित क्षेत्रमा राहत सामग्री पुर्‍याउने काम पनि भइरहेको उनले बताएका छन् । हालसम्म ३२ ट्रक खाद्य तथा गैरखाद्य सामग्री पठाइएको तथा हेलिकप्टरबाट समेत ६ उडान गरी राहत सामग्री प्रभावित क्षेत्रमा पुर्‍याइएको छ ।

भोटेकोशी–त्रिशूली करिडोरमा बेपत्ता नागरिक तथा शवको खोजी कार्य रसुवाबाट नुवाकोट, धादिङ हुँदै गोरखा, तनहुँ, चितवन र नवलपरासीसम्म विस्तार गरिएको छ ।

विदेशी नागरिकको उद्धार तथा पहिचानका लागि समेत विशेष समन्वय भइरहेको प्रधानमन्त्री शाहले बताएका छन् । हालसम्म १२९ जना विदेशी पर्यटक तथा नागरिकको उद्धार तथा पहिचान भएको र परराष्ट्र मन्त्रालयले सम्बन्धित दूतावास तथा परिवारसँग समन्वय गर्न आपतकालीन नियन्त्रण कक्ष सञ्चालन गरेको उनले जानकारी दिएका छन् ।

बाढी प्रभावित क्षेत्रमा पुनः बाढीको जोखिमसमेत निरन्तर निगरानीमा रहेको प्रधानमन्त्री शाहले बताएका छन् । जोखिमयुक्त क्षेत्रमा पूर्वसूचना प्रवाह तथा सुरक्षित स्थानमा स्थानान्तरणको तयारी भइरहेको छ । हालसम्म दुई लाखभन्दा बढी एसएमएसमार्फत पूर्वसूचना दिइएको छ ।

सडक सम्पर्क पुनःस्थापनाको कामसमेत तीव्र पारिएको उनले बताएका छन् । काठमाडौं–मुग्लिन सडकखण्ड एकतर्फी सञ्चालनमा ल्याइएको तथा वैकल्पिक सडकमार्फत रसुवालाई पुनः सडक सञ्जालसँग जोडिएको प्रधानमन्त्री शाहले जानकारी दिएका छन् ।

प्रभावित क्षेत्रको सडक, पुल, विद्युत्, खानेपानी, दूरसञ्चार तथा जलविद्युत् संरचनाको क्षति मूल्यांकनका लागि १५ वटा प्राविधिक टोली परिचालन गरिएको छ ।

प्रधानमन्त्री शाहका अनुसार बाढी प्रभावित १५ वटा स्थानीय तहलाई तत्काल राहत, उद्धार तथा व्यवस्थापनका लागि ६ करोड ७५ लाख रुपैयाँ उपलब्ध गराइएको छ । प्रधानमन्त्री दैवी प्रकोप उद्धार कोषमा पछिल्लो करिब ३६ घण्टामा एक अर्ब ९१ करोड रुपैयाँभन्दा बढी रकम संकलन भएको छ ।

प्रभावित व्यक्ति, परिवार तथा व्यवसायका लागि राहत तथा पुनःस्थापना प्याकेज तयार भइरहेको उनले बताएका छन् ।

‘मैदानको वास्तविक अवस्था बुझेर आवश्यक निर्णय गर्ने र स्रोतसाधन त्यहीअनुसार परिचालन गर्ने गरी हामी निरन्तर काम गरिरहेका छौँ,’ प्रधानमन्त्री शाहले भनेका छन् ।