समाज

पृथ्वी राजमार्ग खुल्यो, काठमाडौंँबाट भोलि बिहानदेखि मात्र सवारी चल्ने

सिधाकुरा

शुक्रबार, भदौ १२, २०८३

पृथ्वी राजमार्ग खुल्यो, काठमाडौंँबाट भोलि बिहानदेखि मात्र सवारी चल्ने

काठमाडौं । भोटेकोशी र त्रिशूली नदीमा आएको बाढीका कारण अवरुद्ध पृथ्वी राजमार्ग सञ्चालनमा आएको छ। राजमार्गमा थुप्रिएको लेदो पन्छाएपछि शुक्रबार साँझदेखि सडक सञ्चालनमा आएको काठमाडौं उपत्यका ट्राफिक प्रहरी कार्यालयले जनाएको छ।

Watch On

कार्यालयका प्रवक्ता प्रहरी उपरीक्षक नरेशराज सुवेदीका अनुसार सडक खुलेसँगै लामो समयदेखि राजमार्गमा अलपत्र परेका सवारीसाधनलाई सुरक्षित गन्तव्यतर्फ पठाउन थालिएको छ।

‘रातभर लामो समयदेखि राजमार्गमा अड्किएका सवारीसाधनलाई सुरक्षित स्थानतर्फ पठाइनेछ,’ उनले भने।

यद्यपि काठमाडौं उपत्यकाबाट बाहिरिने सार्वजनिक सवारीसाधन भने शनिबार बिहानदेखि मात्रै सञ्चालन गरिने भएको छ।

नयाँ बसपार्क सञ्चालन गर्दै आएको लोत्से बहुउद्देश्यीय प्रालिका महाप्रबन्धक पंकज मल्लले रातभर राजमार्गमा अड्किएका सवारीसाधनलाई गन्तव्यतर्फ पठाएपछि शनिबार बिहानदेखि मात्रै काठमाडौंँबाट सार्वजनिक सवारीसाधन बाहिर पठाउने तयारी भइरहेको बताए।

बाढीका कारण पृथ्वी राजमार्गका विभिन्न स्थानमा लेदो तथा माटो थुप्रिएपछि यातायात अवरुद्ध भएको थियो। सडक खुले पनि जोखिमलाई ध्यानमा राख्दै सार्वजनिक सवारीसाधन सञ्चालनमा सावधानी अपनाइने जनाइएको छ।

प्रकाशित मिति: शुक्रबार, भदौ १२, २०८३

प्रतिक्रिया दिनुहोस्