बाढीपहिरोका कारण यी राजमार्ग तथा सडकखण्ड छन् अवरुद्ध

काठमाडौँ । बाढी र पहिरोका कारण देशका विभिन्न प्रदेशमा मुख्य राजमार्ग तथा सडकखण्ड अवरुद्ध तथा प्रभावित भएका छन् ।

Watch On

नेपाल प्रहरीले दिएको जानकारीअनुसार कोशी प्रदेशअन्तर्गत मेची राजमार्गको इलाम नगरपालिका–९ राजदुवाली क्षेत्रमा पहिरोका कारण सडक पूर्ण रूपमा अवरुद्ध भएको छ । उक्त स्थानमा वैकल्पिक बाटो प्रयोग गर्न सकिने जनाइएको छ ।

बागमती प्रदेशअन्तर्गत बीपी राजमार्गको काभ्रे–सिन्धुली खण्डमा सम्भावित बाढीका कारण साँझ ६ बजेदेखि बिहान ४ बजेसम्म सम्पूर्ण सवारीसाधन सञ्चालनमा रोक लगाइएको छ । दिउँसोको समयमा भने परिस्थिति हेरी सवारी सञ्चालन हुने जनाइएको छ ।

कान्तिलोकपथमा साँझ ५ बजेदेखि बिहान ५ बजेसम्म सवारीसाधन सञ्चालनमा रोक लगाइएको छ ।

रसुवाको त्रिशूली–मैलुङ–स्याफ्रुबेँसी सडकखण्डअन्तर्गत उत्तरगया गाउँपालिका–५ खाल्टेमा बाढीका कारण सडक पूर्ण रूपमा अवरुद्ध भएको छ । उक्त सडक लामो समयसम्म सञ्चालनमा आउन नसक्ने जनाइएको छ । रसुवाको मुख्य राजमार्ग पनि अर्को सूचना नभएसम्मका लागि पूर्ण रूपमा अवरुद्ध रहेको प्रहरीले जनाएको छ ।

नुवाकोटको टोखा–छहरे सडकखण्डअन्तर्गत शिवपुरी गाउँपालिका–८ घट्टेखोलामा राति १० बजेदेखि बिहान ५ बजेसम्म रात्रिकालीन सवारीसाधन सञ्चालनमा रोक लगाइएको छ ।

पृथ्वी राजमार्गअन्तर्गत धादिङको बेनिघाटरोराङ, गजुरी र गल्छीका विभिन्न स्थानमा बाढीका कारण सडक एकतर्फी मात्र सञ्चालनमा रहेको छ । ज्याङखोला, बिहानीपम्प, गलौदी, जहरेखेत, बाङ्गेमोड र बैरेनीलगायतका स्थान प्रभावित भएका छन् ।

सिन्धुपाल्चोकको अरनिको राजमार्गअन्तर्गत भोटेकोशी गाउँपालिका–२ कोदारी क्षेत्रमा पहिरोका कारण सडक पूर्ण रूपमा अवरुद्ध भएको छ ।

लुम्बिनी प्रदेशअन्तर्गत रोल्पाको शहीद राजमार्गको परिवर्तन गाउँपालिका–४ खरिबोट क्षेत्रमा पहिरोका कारण सडक पूर्ण रूपमा अवरुद्ध भएको छ ।

यस्तै, कर्णाली प्रदेशअन्तर्गत रुकुम पश्चिमको जाजरकोट–डोल्पा सडकखण्डको आठबीसकोट नगरपालिका–६ रिजेगार्ड खोलामा बाढीका कारण सडक पूर्ण रूपमा अवरुद्ध भएको प्रहरीले जनाएको छ ।

उपत्यकाअन्तर्गत नागढुङ्गादेखि मुग्लिनसम्मको सडक पूर्ण रूपमा सञ्चालनमा आए पनि बैरेनी बजारको करिब एक किलोमिटर सडकखण्डमा भने एकतर्फी मात्र सवारी सञ्चालन भइरहेको जनाइएको छ ।