भोटेकोशी बाढीमा ५७९ जनाको शव फेला, एक हजार १२४ सम्पर्कविहीन

काठमाडौँ । रसुवाको भोटेकोशी नदीमा आएको बाढीबाट भएको क्षतिको विवरणअनुसार हालसम्म ५७९ जनाको शव फेला परेको छ भने एक हजार १२४ जना सम्पर्कविहीन रहेका छन् ।

Watch On

राष्ट्रिय विपद् जोखिम न्यूनीकरण तथा व्यवस्थापन प्राधिकरणको स्थिति प्रतिवेदन नं. ०७ अनुसार भदौ १२ गते साँझ ७ बजेसम्म रसुवामा १२, नुवाकोटमा ३७, धादिङमा ४०, गोरखामा ४६, नवलपरासी पूर्वमा १५४, नवलपरासी पश्चिममा २७, तनहुँमा ३० र चितवनमा २३३ जनाको शव फेला परेको छ ।

सम्पर्कविहीन हुनेमा नेपाल प्रहरीका २७, नेपाली सेनाका ४५, सशस्त्र प्रहरी बल नेपालका १३, भन्सार कार्यालयका १५ तथा अध्यागमन कार्यालयका १५ जना छन् । यस्तै रसुवाका १६१, नुवाकोटका एक, जलविद्युत् आयोजनामा कार्यरत १३३, मकवानपुरका ६६ जना सम्पर्कविहीन रहेको प्रतिवेदनमा उल्लेख छ ।

त्यसैगरी ५१७ जना विदेशी नागरिक, नेपाल घुम्न आएका विदेशमा बस्ने १२७ नेपाली नागरिक र लाङटाङ राष्ट्रिय निकुञ्जका तीन जना पनि सम्पर्कविहीन रहेको जनाइएको छ ।

बाढीबाट क्षतिग्रस्त १९८ टेलिफोन टावरमध्ये मर्मतपछि १४४ वटा सञ्चालनमा आएका छन् । बाढीमा घाइते भएकामध्ये १५ जना विभिन्न अस्पतालमा उपचाररत छन् भने सर्जिकल मेडिकल टिमसमेत परिचालन गरिएको छ ।

१५ हजारभन्दा बढी सुरक्षाकर्मी परिचालन

बाढी प्रभावित क्षेत्रमा खोज तथा उद्धारका लागि नेपाल प्रहरी, नेपाली सेना र सशस्त्र प्रहरी बल नेपालका गरी १५ हजार ४३१ सुरक्षाकर्मी परिचालन गरिएको छ । नेपाली सेनाका ६ हजार ७५५, नेपाल प्रहरीका चार हजार ४७३ र सशस्त्र प्रहरी बलका चार हजार २०३ जना उद्धारमा खटिएका छन् ।

हालसम्म चार हजार ४५१ जनाको उद्धार गरिएको छ । उद्धार गरिएकामध्ये १९१ जना विद्युत्को सुरुङबाट उद्धार गरिएको तथा शुक्रबार हवाई माध्यमबाट ५१७ जनाको उद्धार गरिएको प्राधिकरणले जनाएको छ । उद्धार गरिएकामध्ये १२९ जना विदेशी नागरिक रहेका छन् ।

नेपाली सेना र निजी क्षेत्रका गरी १६ वटा हेलिकप्टरबाट ९९ वटा हवाई उडानमार्फत उद्धार गरिएको छ ।

प्रभावित जिल्लामा करोडौँको नगद सहायता

नेपाल सरकारले बाढी प्रभावित क्षेत्रको तत्कालीन व्यवस्थापनका लागि रसुवामा एक करोड, नुवाकोटमा एक करोड, धादिङमा ५० लाख तथा १५ वटा स्थानीय तहलाई गरी छ करोड ७५ लाख रुपैयाँ नगद सहायता उपलब्ध गराएको छ ।

यस्तै, नुवाकोटका भैरवी, सूर्यमती र पञ्चकन्या आयल स्टोरमा ४१ हजार लिटर डिजेल र २४ हजार लिटर पेट्रोल मौज्दात रहेको जनाइएको छ । हवाई उद्धार तथा राहतका लागि १७ हजार लिटर हवाई इन्धनसमेत नुवाकोट पठाइएको प्राधिकरणले जनाएको छ ।