परराष्ट्रमन्त्री खनाल र चिनियाँ विदेशमन्त्री वाङबीच  के भयो कुराकानी ?

काठमाडौं । परराष्ट्रमन्त्री शिशिर खनाल र चिनियाँ विदेशमन्त्री वाङ यीबीच शनिबार टेलिफोन वार्ता भएको छ।

Watch On

वार्ताका क्रममा रसुवा–जिलोङ बन्दरगाह क्षेत्रमा आएको विनाशकारी बाढीबाट नेपाल र चीनमा भएको जनधनको क्षतिप्रति दुवै नेताले दुःख व्यक्त गरेका छन्। उनीहरूले बाढीमा परी ज्यान गुमाउनेहरूप्रति श्रद्धाञ्जली अर्पण गर्दै शोकसन्तप्त परिवारप्रति समवेदना व्यक्त गरेका छन्।

दुवै नेताबीच बाढी प्रभावित क्षेत्रमा जारी खोज, उद्धार तथा राहत कार्यबारे छलफल भएको छ। साथै, चीनमा बाढीका कारण अलपत्र परेका नेपाली नागरिकको उद्धार तथा स्वदेश फिर्तीका विषयमा समेत कुराकानी भएको छ।

परराष्ट्रमन्त्री खनालले विपद्को कठिन घडीमा चीन सरकारले उपलब्ध गराएको आकस्मिक मानवीय राहत तथा सहयोगप्रति विदेशमन्त्री वाङमार्फत चिनियाँ सरकारलाई धन्यवाद दिएका छन्।

वार्तामा नेपाल र चीनबीच वास्तविक समयका जल तथा मौसमसम्बन्धी तथ्यांक आदानप्रदानलाई थप प्रभावकारी बनाउने विषयमा पनि छलफल भएको छ।

भविष्यमा यस्ता विपद्को जोखिम न्यूनीकरण गर्न प्रभावकारी पूर्वसूचना प्रणाली विकास गर्नुका साथै दुई देशबीच विद्यमान संयन्त्रलाई थप सुदृढ गर्दै सहकार्य बढाउनेमा दुवै पक्षले जोड दिएका छन्।

विपद् व्यवस्थापन, सूचना आदानप्रदान तथा पूर्वसूचना प्रणालीलाई प्रभावकारी बनाउन नेपाल र चीनबीच निरन्तर समन्वय र सहकार्य गर्ने विषयमा समेत कुराकानी भएको छ।