त्रिशूली–३ ‘ए’ उद्धार अपडेट : ७ मिटर ड्रिलिङ, टनेलभित्र पानी नरहेको देखियो

काठमाडौँ । त्रिशूली–३ ‘ए’ जलविद्युत् आयोजनाको सुरुङमार्गभित्र फसेका मजदुर, कर्मचारी र स्थानीयको उद्धार कार्य निरन्तर अघि बढिरहेको छ ।

Watch On

नेपाल विद्युत प्राधिकरणको पछिल्लो विवरणअनुसार माथिल्लो भागबाट गरिएको ड्रिलिङ करिब ७ मिटरसम्म पुगेपछि टनेलको क्राउन भेटिएको छ । त्यसपछि भित्र अक्सिजन तथा माइक्रोफोन पठाएर गरिएको प्रारम्भिक जाँचमा टनेलभित्र पानी नरहेको पाइएको छ ।

यद्यपि, मुख्य केबल टनेलको बिन्दु भने अझै यकिन रूपमा पहिचान हुन सकेको छैन । सोही बिन्दु पत्ता लगाउने उद्देश्यले थप कार्य जारी रहेको प्राधिकरणले जनाएको छ ।

प्राधिकरणकाअनुसार बोर्ड सदस्य अंशुकिरण शाहीकाअनुसार बाढीको सतह बढेका कारण साइटमा खटिएका सबै जनशक्तिलाई हाल सुरक्षित रूपमा माथिल्लो भागमा सारिएको छ । पानीको सतह कम भएपछि तल्लो भागमा पुनः पुगेर उद्धार कार्य अघि बढाउने तयारी छ ।

साइटमा गरिएको उत्खननको केही भाग बाढीका कारण प्रभावित भएको छ । एक्साभेटर लगायतका मेसिनरीहरू भने सुरक्षित अवस्थामा छन् ।

शान्ति बजारबाट साइटतर्फ जाने पहुँच सडक केही प्रभावित भएको छ ।

प्राधिकरणकाअनुसार केबल ड्रमदेखि चार्जिङसम्मको सम्पूर्ण चार्जिङ सेटअप तयार अवस्थामा रहेको छ । हाल सबै जनशक्ति माथिल्लो सुरक्षित स्थानमा रहेकाले चार्जिङसम्बन्धी काममा केही अवरोध आएको हो । पानीको सतह कम भई तल्लो भागमा पुग्न सकिने अवस्था बनेपछि चार्जिङ कार्य अघि बढाइने प्राधिकरणले जनाएको छ । 

राति करिब बिहान ४:३० बजेसम्म काम भएको र त्यसपछि बाढीको सतह तथा सुरक्षा अवस्थाका कारण काम रोकिएको बोर्ड सदस्य शाहीले बताए । 

हालको अवस्थाअनुसार एक्साभेटर अपरेटर तत्काल आवश्यक नरहेको अवस्था छ ।

मानवीय जीवनको सुरक्षा सर्वोच्च प्राथमिकतामा राख्दै, मौसम तथा साइटको सुरक्षा अवस्था अनुकूल हुनेबित्तिकै उद्धार तथा खोजी कार्यलाई पुनः तीव्रताका साथ अघि बढाइने शाहीले बताए । 'सबैको सुरक्षित उद्धारका लागि प्रयास निरन्तर जारी छ,' उनले भने ।