समाज

शिक्षक भानुभक्त राईको कुटपिटपछि हत्या, ११ जना पक्राउ

सिधाकुरा

बुधबार, भदौ १७, २०८३

शिक्षक भानुभक्त राईको कुटपिटपछि हत्या, ११ जना पक्राउ

भोजपुर । भोजपुरमा कुटपिटबाट शिक्षक भानुभक्त राईको हत्या गरेको आरोपमा प्रहरीले ११ जनालाई पक्राउ गरेको छ।

Watch On

जिल्ला प्रहरी कार्यालय भोजपुरका अनुसार असार ११ गते राति करिब ११ः४५ बजे साल्पासिलिछो गाउँपालिका–५ माबुस्थित भदौरे मेलामा पुरानो विवादका कारण राईमाथि कुटपिट भएको थियो। कुटपिटबाट गम्भीर घाइते भएका उनको मृत्यु भएको प्रहरीले जनाएको छ।

मृतक राई खोटाङको केपिलासगढी गाउँपालिका–७ का ३९ वर्षीय हुन्। उनी स्थानीय सूर्य माध्यमिक विद्यालयमा राहत कोटामा शिक्षकका रूपमा कार्यरत थिए।

घटनामा संलग्न भएको आशंकामा प्रहरीले खोटाङको केपिलासगढी गाउँपालिका–७ का ११ जनालाई भदौ १२ गते पक्राउ गरेको हो।

पक्राउ पर्नेमा २१ वर्षीय प्रवेश भन्ने सागर कोयी राई, २१ वर्षीय मौली भन्ने प्रतीक राई, २५ वर्षीय माइकल भन्ने निशान राई, २३ वर्षीय सुशील राई, ३२ वर्षीय शेरबहादुर भन्ने अमर राई, ३० वर्षीय उमेश भन्ने उमेश दुमी राई, ३५ वर्षीया तारादेवी राई, ४८ वर्षीया सुमिता राई, ४३ वर्षीया तेजकुमारी राई, १९ वर्षीया देविका राई र २० वर्षीया चन्द्रकला राई छन्।

पक्राउ परेका उनीहरूमाथि जिल्ला अदालत भोजपुरबाट भदौ १४ गते पाँच दिनको म्याद थप गरी अनुसन्धान भइरहेको जिल्ला प्रहरी कार्यालय भोजपुरले जनाएको छ।

प्रकाशित मिति: बुधबार, भदौ १७, २०८३

प्रतिक्रिया दिनुहोस्