माथिल्लो त्रिशूली ‘थ्री ए’ को टनेलभित्र नेपाली सेना प्रवेश, उद्धार प्रयास जारी

काठमाडौं । माथिल्लो त्रिशूली थ्री ‘ए’ जलविद्युत् आयोजनाको पावर हाउसतर्फ उद्धारका लागि नेपाली सेना टनेलभित्र प्रवेश गर्न सफल भएको छ ।

Watch On

नेपाल विद्युत् प्राधिकरणका अनुसार टनेलको मुखबाट करिब १५ फिटभित्रसम्म रहेको भग्नावशेष (डेब्रिज) हटाएपछि नेपाली सेना त्यहाँसम्म पुग्न सफल भएको हो । थप अगाडिसम्म पुगेर खोज तथा उद्धार गर्ने प्रयास निरन्तर भइरहेको प्राधिकरणले जनाएको छ ।

बाढीपछि टनेलभित्र जमेको पानी निकास गर्न दिनरात निरन्तर काम गरिएको र पानी निकास गर्न सम्भव भएको प्राधिकरणले जनाएको छ ।

खोज तथा उद्धार कार्यलाई प्रभावकारी बनाउन आवश्यक सामग्री तथा खाद्यान्नको अभाव हुन नदिन आवश्यक बजेट, सामग्रीको प्राप्ति तथा खर्च र त्यसको अभिलेख व्यवस्थापन गर्ने निर्णयसमेत गरिएको छ । एसएमटी बैठकले उक्त निर्णय गरेको प्राधिकरणले जनाएको छ ।

त्यस्तै, खोज तथा उद्धार समितिसँग समन्वय गरी प्राधिकरणका सम्पर्कमा आएका तथा नआएका सम्पूर्ण कर्मचारी र कामदारको विवरण अद्यावधिक गर्ने निर्णय भएको छ । सम्पर्क हुन नसकेका कर्मचारी तथा कामदारका परिवारजनको पीरमर्का र गुनासो सुन्ने तथा आवश्यक सहयोग र समन्वय गर्न जनसाधन विभागका निर्देशकको संयोजकत्वमा समिति गठन गरिएको छ ।

हालसम्म सम्पर्कमा नआएका कर्मचारी तथा कामदारका केही आफन्तलाई बाढीबाट क्षतिग्रस्त माथिल्लो त्रिशूली थ्री ‘ए’ जलविद्युत् उत्पादन केन्द्रको पावर हाउस साइटसम्म जाने व्यवस्था मिलाइएको प्राधिकरणले जनाएको छ ।

भदौ १० गते त्रिशूली र भोटेकोशी नदीमा आएको बाढीबाट प्राधिकरणका जलविद्युत् आयोजनामा ठूलो क्षति भएको थियो । बाढीपछि प्राधिकरणले खोज तथा उद्धारसँगै विद्युत् आपूर्ति सुचारु गर्न विभिन्न काम अघि बढाएको छ ।

प्राधिकरणले बाढीबाट प्रभावित आयोजनामा भइरहेका खोज तथा उद्धार, पुनःस्थापना तथा विद्युत् आपूर्ति सुचारु गर्ने कामका मुख्य प्रगति नियमित रूपमा सार्वजनिक गर्ने व्यवस्था गरेको जनाएको छ ।