कस्तो छ बाढीपछि पृथ्वी राजमार्गको अवस्था ? (तस्बिरहरू)

काठमाडौँ । भोटेकोशी र त्रिशूलीको बाढीले कटान गरेका कारण पृथ्वी राजमार्गका विभिन्न स्थानमा सडक भासिएर यातायात प्रभावित छ । 

Watch On

संघीय राजधानी काठमाडौँलाई जोड्ने पृथ्वी राजमार्गमा आवातजावत नै प्रभावित हुने गरेर त्रिशूलीले कटान गरेको छ । 

नागढुङ्गा–मुग्लिङ सडक आयोजना पूर्वी खण्डका इन्जिनियर राजीव मानन्धरका अनुसार मलेखुभन्दा अगाडि कृष्णभीरमा करिब १ सय २० मिटर सडक बाढीले कटान गरेपछि पहिरो खसेर भासिएको छ ।

मलेखुबाट काठमाडौंतर्फ करिब एक किलोमिटरको दूरीमा पर्ने परेवाभीरमा करिब एक सय मिटर सडक कटान गरेको छ ।

परेवाभीरमा सडक विभागले भित्तातर्फबाट करिब एक सय मिटर वैकल्पिक सडक निर्माण गरी ग्राभेलिङ तथा मर्मतको काम अघि बढाएको छ । मर्मत सम्पन्न भएपछि ठूला मालवाहक सवारीसमेत सञ्चालन गर्ने लक्ष्य रहेको इन्जिनियर मानन्धरले बताए।

यसैगरी छहरे–चालिसे क्षेत्रमा करिब ४० मिटर सडक कटान हुँदा एकतर्फी यातायात सञ्चालन भइरहेको छ । नागढुङ्गा चेकपोस्टबाट करिब ५ सयमिटर टाढा पनि करिब ८० मिटर सडक पहिरो गएपछि एक लेनबाट यातायात सञ्चालन भइरहेको छ।

पृथ्वी राजमार्गको अवस्था जोखिमपूर्ण रहेकाले सडक विभागले यात्रु तथा मालवाहक सवारीका लागि वैकल्पिक मार्ग प्रयोग गर्न आग्रह गरेको छ । ठूला मालवाहक सवारीका लागि बीपी राजमार्ग, कान्ति लोकपथ र त्रिभुवन राजपथलाई वैकल्पिक मार्गका रूपमा प्रयोग गर्न सकिने विभागले जनाएको छ । हेटौँडा–फर्पिङ हुँदै काठमाडौं आउने साना सवारीका लागि पनि वैकल्पिक मार्ग तोकिएको छ।

यसैबीच, फिस्लिङ क्षेत्रमा रोकिएका यात्रुका लागि ज्यामिरेघाट पुल हुँदै गोरखाको सिउरेनीटार–घ्याल्चोकबाट बेनीघाट पुल निस्कने वैकल्पिक मार्गसमेत प्रयोग गर्न सकिने छ। परेवाटारको सडक मर्मत सकेर १२ चक्केसम्मका मालवाहक सवारी सञ्चालन गर्ने तयारी छ ।