ओली हटाउने, नहटाउने सुझाव तयार पार्न गठित कार्यदलको बैठक दुई महिनापछि बस्दै

काठमाडौं।  नेकपा एमाले पुनर्गठन कार्यदलको बैठक दुई महिनापछि बस्न लागेको छ। पार्टी प्रचार विभाग प्रमुख निरज आचार्यका अनुसार शुक्रबार बिहान ११ बजे पार्टी केन्द्रीय कार्यालय च्यासलमा बैठक बस्न लागेको हो ।

Watch On

‘कार्यदल बैठक भोलि बिहान ११ बजे बस्ने तय भएको छ,’ आचार्यले सिधाकुरासँग भने।

आचार्यका अनुसार कार्यदलले तयार पारेको प्रतिवेदनमाथि छलफलको कार्यसूची छ । यसअघि असार २५ गते बसेको बैठकले प्रतिवेदन तयार पार्ने जिम्मा कार्यदलका संयोजक रामबहादुर थापा ‘बादल’ र महासचिव शंकर पोखरेललाई दिएको थियो।

पोखरेल र बादलले छुट्टाछुट्टै प्रतिवेदन तयार पारेका छन्।

यसअघि महासचिव पोखरेलले प्रतिवेदन तयार पारी संयोजक बादललाई दिएका थिए।

तर अध्यक्ष केपी शर्मा ओलीले पोखरेलको प्रतिवेदनलाई अस्वीकार गर्दै अर्को लेख्न भनेपछि बादलले छुट्टै तयार पारेका हुन्।

एमालेका एक नेताले बताएअनुसार बादलले त्यही प्रतिवेदन बैठकमा पेश गर्नेछन्।

गत फागुन २१ को चुनावमा एमाले २५ सिटमा खुम्चिएपछि अध्यक्ष ओलीले राजीनामा दिनुपर्ने र पार्टी पुनर्गठनको बहस उठेको थियो। सचिवालय बैठकमा पनि पार्टी पुनर्गठनको पक्षमा अधिकांश सदस्य खुलेपछि कार्यदल बनाइएको थियो।

जेठ १० गते गठन गरिएको कार्यदललाई एक महिनाभित्र सुझाव पेश गर्न कार्यादेश दिइए पनि अहिलेसम्म प्रतिवेदनले नै अन्तिम रूप पाउन सकेको छैन।

कार्यदलले आठ वटा भौगोलिक प्रदेश, गैरभौलिक र निकायसमेत गरी १३ वटा समूहबाट सुझाव लिएर प्रतिवेदनलाई अन्तिम रूप दिने तयारी गरेको छ ।