पहिले एउटा प्रतिवेदनलाई दुइटा बनाइयो, अब फेरि एउटै बनाउने

काठमाडौँ । लामो रस्साकस्सी र प्रतीक्षापछि नेकपा (एमाले)को ‘निर्वाचन समीक्षा तथा पार्टी पुनर्गठन कार्यदल’को बैठक आज पार्टी केन्द्रीय कार्यालय, च्यासलमा बस्यो । 

Watch On

बैठकमा सुरुमै कार्यदलका संयोजक रामबहादुर थापाले दुईवटा छुट्टाछुट्टै प्रतिवेदन प्रस्तुत गरे । प्रतिवेदन प्रस्तुत गर्दै थापाले भनेका थिए– ‘एउटा महासचिवको तर्फबाट र अर्को मेरो तर्फबाट ।’

खासमा कार्यदलको प्रतिवेदन लेख्ने जिम्मेवारी महासचिव शंकर पोखरेललाई दिइएको थियो । जिम्मेवारी अनुसार पोखरेलले प्रतिवेदन तयार पनि पारे । तर, उनको प्रतिवेदन अध्यक्ष केपी शर्मा ओलीलाई चित्त बुझेन ।

आफूलाई चित्त नबुझेपछि ओलीले अर्को प्रतिवेदन तयार पार्न उपाध्यक्ष थापालाई निर्देशन दिए ।

ओलीको हरेक निर्णयमा सहमति जनाउँदै आइरहेका उपाध्यक्ष एवम् कार्यदलका संयोजक थापाले यसमा पनि सहमति जनाइहाले र छुट्टै प्रतिवेदन लेखे । र, आज उनले कार्यदलको बैठकमा पेश गरे । 

थापा र पोखरेलका तर्फबाट पेश भएका दुवै प्रतिवेदनमाथि कार्यदलमा सामान्य छलफल भयो । तर, छलफलले गति लिन सकेन । 

कार्यदलमा रहेका एक नेताका अनुसार, अधिकांशको सुझाव दुवै प्रतिवेदनलाई समेटेर एउटै बनाउनुपर्ने रह्यो । त्यसपछि नेताहरुले उपाय निकाले– भोलि साँझदेखि आवासीय बैठक बस्ने र दुवै प्रतिवेदनलाई समेटेर एउटै प्रतिवेदन बनाउने ।

आजको सहमतिअनुसार, भोलि साँझ पुनः कार्यदलको बैठक बस्नेछ । नेताहरुका अनुसार, महासचिव पोखरेलले तयार पारेको प्रतिवेदनमा नेतृत्वकै पुनर्गठन गर्नुपर्ने सुझाव दिइएको छ भने उपाध्यक्ष थापाको प्रतिवेदनमा पुनर्गठनको मुद्दा असान्दर्भिक र बेमौसमी राग भनिएको छ ।