समाज

बाणगङ्गा नदीमा फसेका १२ जनाको यसरी भयो उद्धार

सिधाकुरा

आइतबार, भदौ २८, २०८३

बाणगङ्गा नदीमा फसेका १२ जनाको यसरी भयो उद्धार

कपिलवस्तु । कपिलवस्तु नगरपालिका–६ बर्मेलीस्थित बाणगङ्गा नदीमा शनिबार राति आएको अचानक बाढीमा फसेका १२ जनाको सशस्त्र प्रहरीले सकुशल उद्धार गरेको छ।

Watch On

नदीमा पानीको बहाव बढेपछि फसेका ११ महिला र एक पुरुषलाई सशस्त्र प्रहरी बल, नेपाल नं. २८ गण हेडक्वार्टर कपिलवस्तुबाट खटिएको टोलीले उद्धार गरी सुरक्षित स्थानमा पुर्‍याएको हो।

सशस्त्र प्रहरी उपरीक्षक गोपाल अधिकारीका अनुसार नदीमा एक्कासि बाढी आएर मानिसहरू फसेको सूचना प्राप्त भएपछि टोलीलाई तत्काल घटनास्थलमा परिचालन गरिएको थियो।

उद्धार गरिएकामा कपिलवस्तु नगरपालिका–६ की ७० वर्षीया गोपी परियार, ७० वर्षीया किरली परियार, २४ वर्षीया कविता कुमाल, ३८ वर्षीया रामी वयम्बु, ३२ वर्षीया मीना वयम्बु, ४५ वर्षीया बेलमति सुनार, ४५ वर्षीया सुश्मा जिसी, १८ वर्षीया लालुमाया श्रेष्ठ, ३४ वर्षीया लक्ष्मी परियार, ४० वर्षीया बिना विक, २४ वर्षीया बिन्दा थापा र ३७ वर्षीय रेशम परियार छन्।

घटनाको सूचना पाएलगत्तै नेपाल प्रहरी र सशस्त्र प्रहरीको संयुक्त टोली घटनास्थल पुगेर उद्धार कार्य गरेको थियो। उद्धार गरिएका सबैलाई सुरक्षित स्थानमा पुर्‍याइएको सशस्त्र प्रहरी बल, नेपाल नं. २८ गण हेडक्वार्टर कपिलवस्तुले जनाएको छ।

प्रकाशित मिति: आइतबार, भदौ २८, २०८३

प्रतिक्रिया दिनुहोस्