सरकारी कर्जा दुरुपयोगको आरोप लागेका उमेश गुप्ता फेरि औद्योगिक प्रतिष्ठानको कार्यकारी निर्देशकमा सिफारिस

काठमाडौँ । उद्योग, वाणिज्य तथा आपूर्ति मन्त्रालय अन्तर्गतको औद्योगिक व्यवसाय विकास प्रतिष्ठानको कार्यकारी निर्देशक नियुक्ति प्रक्रिया नै विवादमाा परेको छ । 

Watch On

एउटै परिवारका श्रीमान्–श्रीमतीलाई फरक फरक स्टार्टप कर्जा दिएर छानबिनमा तानिएका तत्कालीन कार्यकारी निर्देशक उमेशकुमार गुप्तालाई नै फेरि १ नम्बरमा सिफारिस गरेपछि प्रक्रिया नै विवादित बनेको हो । 

रिक्त कार्यकारी निर्देशक छनोट समितिले बुधबार सबैभन्दा बढी अंक प्राप्त गर्ने ३ जना उम्मेदवारको नाम सिफारिस गरेको छ । सिफारिसमा परेका तीन जनामध्ये पर्साका उमेशकुमार गुप्ता १ नम्बरमा छन् । दोस्रो नम्बरमा चितवन भरतपुरका दिलिपराज पौडेल र तेस्रो नम्बरमा काठमाडौँका नवराज सापकोटा सिफारिसमा परेका छन्।

गुप्ता यसअघि तत्कालीन *प्रधानमन्त्री पुष्पकमल दाहाल ‘प्रचण्ड’ को कार्यकालमा कार्यकारी निर्देशक नियुक्त भए । गुप्ताले स्टार्टअप कर्जा वितरणमा अनियमितता गरेको आरोप लागेपछि उनीमाथि छानबिन गर्न उद्योग मन्त्रालयले छानबिन समिति नै बनाएको थियो ।

प्रतिष्ठानका लागि विज्ञहरुको रोस्टरमासमेत मापदण्ड बिना स्वार्थ बाझिने व्यक्ति राखेपछि गुप्ता थप विवादित बनेका थिए । 

*२०८० मंसिरदेखि २०८३ वैशाखसम्म प्रतिष्ठानमा रहेका गुप्ताविरुद्ध प्रतिष्ठानकै कर्मचारीले छानबिनको माग गर्दै मन्त्रालयमा निवदेन दिएका थिए । 

हाल उद्योग मन्त्रालयमा रहेका सहसचिव नेत्र सुवेदीसँगको निकटता देखाएर गुप्ताले नियुक्ति हुनुपूर्व नै प्रतिष्ठानका कर्मचारीलाई दबाब दिन थालेको एक कर्मचारीले सिधाकुरालाई बताए ।

कार्यकारी निर्देशकका रुपमा एक कार्यकाल पुरा गरिसकेका र विभिन्न विवादमा तानिएका गुप्तालाई फेरि कार्यकारी निर्देशक नियुक्तिको पहिलो नम्बरमा सिफारिस गरिएपछि सिफारिस समितिको नियतमा समेत शंका देखिएको मन्त्रालयकै अधिकारीहरुले बताएका छन् । *सच्याइएको- सम्पादक

प्रस्तुत समाचार बारे उमेश गुप्ताको खण्डन यसप्रकार छः 

गुप्ताको दाबी- प्रतिष्ठानमा रहँदा कुनै गल्ती गरेको छैन