नगरपालिकाको भवन निर्माण गर्दा खसेको पहिरोले सात घर जोखिममा

कालिकोट । कालिकोटको खाँडाचक्र नगरपालिकाको प्रशासकीय भवन निर्माणका क्रममा खसेको पहिरोले स्थानीयका घर जोखिममा परेका छन् । पहिरोका कारण मान्म बजारको मुख्य सडकसमेत भासिएको छ ।

Watch On

खाँडाचक्र नगरपालिका–१ मान्मको सेरापाटामा निर्माणाधीन प्रशासकीय भवनको जग खन्ने क्रममा गत भदौमा पहिरो खसेको थियो । पहिरोले एउटा घर भत्काउनुका साथै बजारको मुख्य सडकसमेत भासिएको थियो । भवन निर्माणस्थलको माथिल्लो भागमा रहेका सात घर पहिरोको उच्च जोखिममा छन् ।

पहिरो खसेपछि भवन निर्माणको काम प्रभावित भएको छ । नगरपालिकाका उपप्रमुख गणेशबहादुर शाहीले भवन निर्माण सम्पन्न भएपछि पहिरोको समस्या समाधान हुने दाबी गरेका छन् ।

‘भवन बनाएपछि त्यहाँ पछाडि पर्खाल लाग्छ । त्यो भएपछि पहिरोको जोखिम टर्छ,’ उनले भने ।

गत भदौमा भत्किएको घरको क्षतिपूर्तिका लागि मूल्यांकन गरी जिल्ला प्रशासन कार्यालयमार्फत गृह मन्त्रालयमा जानकारी गराइएको उनले बताए । नगरपालिकाको आर्थिक क्षमताभन्दा क्षतिपूर्तिको रकम बढी हुने भएकाले संघीय सरकारसँग सहयोग मागिएको उनको भनाइ छ । पर्खाल नलगाए निर्माणस्थल आसपासका १२ घर पहिरोको जोखिममा पर्ने उनले बताए ।

यसैबीच, राष्ट्रिय राजमार्गको मापदण्डविपरीत भवन निर्माण भइरहेको भन्दै सडक डिभिजन कार्यालय जुम्लाले गत वैशाखमै काम रोक्न नगरपालिकालाई पत्राचार गरेको थियो । सार्वजनिक सडक ऐन, २०३१ अनुसार राजमार्गको दायाँबायाँ ३१ मिटर क्षेत्रभित्र पक्की संरचना बनाउन नपाइने भए पनि नगरपालिकाले सडकबाट ६ मिटर मात्रै छाडेर भवन निर्माण गरिरहेको छ ।

भवन निर्माणले सडक सुरक्षामा जोखिम निम्त्याउने, भविष्यमा सडक विस्तार गर्न समस्या हुने र संरचना भत्काउनुपरे राज्यको लगानी खेर जाने भन्दै सडक डिभिजनले निर्माण रोक्न आग्रह गरेको थियो । तर, नगरपालिकाले उक्त आग्रह बेवास्ता गर्दै निर्माण अघि बढाएको छ ।

पूर्वाधार विकासमन्त्री सुनिल लम्सालले गत साउनमा कर्णाली भ्रमणका क्रममा भवन निर्माण रोक्न नगरपालिकालाई निर्देशन दिएका थिए । उनले मन्त्रिपरिषद्बाट निर्णय गराएर अर्को भवनको व्यवस्था गर्ने आश्वासनसमेत दिएका थिए ।

तर, नगरपालिका भने भवन निर्माणलाई निरन्तरता दिने पक्षमा देखिएको छ । उपप्रमुख शाहीले मुख्य ठेकेदारलाई बोलाइसकिएको र तिहारपछि निर्माणको काम सुरु गरिने बताए ।

नगरपालिकाको प्रशासकीय भवन निर्माणको ठेक्का काठमाडौँको आरएनसीएस बिल्डर्सले १९ करोड ६२ लाख रुपैयाँमा पाएको हो । साततले भवन तीन वर्षभित्र निर्माण सम्पन्न गर्ने सम्झौता छ । भवनको शिलान्यास २०८१ माघमा गरिएको थियो ।

तस्बिर : प्रकाशचन्द्र तिमिल्सेना/नेपाल फोटो लाइब्रेरी