भेनेजुएलाको सैन्य आक्रमणमा नौ कोलम्बियाली विद्रोही मारिएको दाबी

एजेन्सी । भेनेजुएलाको सेनाले सीमा क्षेत्रमा रहेको कोलम्बियाली वामपन्थी विद्रोही समूहको शिविरमा आक्रमण गर्दा कम्तीमा नौ जनाको मृत्यु भएको एक गैरसरकारी संस्थाले जनाएको छ ।

Watch On

फन्डारेड्स नामक संस्थाका निर्देशक जेभियर टाराजोनाले शुक्रबार भेनेजुएलाको अपुरे राज्यस्थित ग्रामीण क्षेत्रमा रहेको विद्रोही शिविरमा सेनाले आक्रमण गरेको जानकारी शनिबार एएफपीलाई दिएका हुन् । सन् २०१६ मा कोलम्बियाली विद्रोही समूह फार्कसँग शान्ति सम्झौता भएपछि भेनेजुएलामा भएको यो पहिलो यस्तो आक्रमण भएको उनको दाबी छ ।

संस्थाले सार्वजनिक गरेको भिडियोमा जमिनमा शव छरिएका, रूख ढलेका र शिविर रहेको अनुमान गरिएको स्थानमा भग्नावशेष देखिएको छ । संस्थाका एक कर्मचारीले भिडियोमा कम्तीमा नौ वटा शव गणना गरेको टाराजोनाले बताए ।

भेनेजुएला सरकारले घटनाबारे टिप्पणीका लागि एएफपीले गरेको अनुरोधको तत्काल जवाफ दिएको छैन ।

सन् २०१६ मा कोलम्बियाली सरकारसँग शान्ति सम्झौता गरेपछि फार्कका अधिकांश लडाकु हतियार त्यागेर शान्ति प्रक्रियामा सहभागी भएका थिए । तर, सम्झौता अस्वीकार गरेका केही समूह भने अझै सक्रिय छन् । यसैबीच, कोलम्बियाको अर्को विद्रोही समूह ईएलएन ल्याटिन अमेरिकाको सबैभन्दा शक्तिशाली विद्रोही समूहका रूपमा रहेको छ ।

कोलम्बिया र भेनेजुएलाबीच दुई हजार किलोमिटरभन्दा लामो सीमा जोडिएको छ । सीमावर्ती क्षेत्रमा विभिन्न विद्रोही समूह सक्रिय छन् । शान्ति सम्झौता अस्वीकार गरेका फार्कका केही समूहले कोकिन तस्करी र अवैध खानीमाथिको नियन्त्रणका लागि एकअर्कासँग सङ्घर्ष गर्दै आएका छन् ।

कोलम्बियाली सरकारले लामो समयदेखि वामपन्थी शासन रहेको भेनेजुएलाले आफ्नो देशका विद्रोही समूहलाई आश्रय दिँदै आएको आरोप लगाउँदै आएको थियो ।

सैन्य मामिलाकी जानकार तथा मानव अधिकारकर्मी रोसियो सान मिगुएलका अनुसार अपुरे राज्यका स्थानीय बासिन्दाले शुक्रबारको सैन्य कारबाहीबारे जानकारी दिएका थिए । उनीहरूले आक्रमणमा थप १० जना ईएलएन लडाकु मारिएको हुन सक्ने बताएका छन् ।