भारतमा विपक्षी गठबन्धनको ठूलो प्रदर्शन, काउन्टरमा उत्रियो सत्ता पक्ष

नयाँदिल्ली । भारतको राजधानी नयाँ दिल्ली स्थित ऐतिहासिक रामलीला मैदानमा विपक्षी ‘इन्डिया’ गठबन्धनले ठूलो प्रदर्शन तथा र्‍याली आयोजना गरेको छ । 'भोट बचाउ, देश बचाउ' नारा दिइएको यो र्‍याली मुख्य निर्वाचन आयुक्त ज्ञानेश कुमारलाई हटाउनुपर्ने र मतदाता नामावलीको 'विशेष गहन पुनरीक्षण' प्रक्रियामा देखिएका कथित अनियमितता तथा 'भोट चोरी'को विरोधमा आयोजना गरिएको हो ।

Watch On

कनाट प्लेसबाट सुरु भई अजमेरी गेट हुँदै रामलीला मैदानसम्म जाने यस मार्च र र्यालीमा कंग्रेस नेता राहुल गान्धी, प्रियंका गान्धी, शिवसेनाका सांसद सञ्जय राउत लगायत इन्डिया गठबन्धनका प्रमुख नेताहरू र विभिन्न राज्यबाट आएका हजारौँ समर्थकहरू सहभागी छन् । शिव सेना सांसद सञ्जय राउतले यसलाई देशको शक्तिको प्रदर्शन भन्दै सरकार परिवर्तनको सङ्केत भएको बताएका छन् ।

सत्ता पक्षको काउन्टर मार्च  

विपक्षीको यो शक्ति प्रदर्शनको काउन्टरमा भारतीय जनता पार्टी (बीजेपी) ले पनि सोही दिन देशव्यापी अभियान अन्तर्गत 'लोकतन्त्र बचाउ, अराजकता हटाउ' मार्चको सुरुवात गरेको छ । 

बीजेपीका राष्ट्रिय अध्यक्ष नितिन नवीनको नेतृत्वमा हरियाणाको रोहतक (छोटूराम पोलिटेक्निक मैदानदेखि मोडल टाउनको डी-पार्कसम्म) पदयात्रा आयोजना गरिएको छ ।

विपक्षी गठबन्धनले भ्रामक जानकारी र दुष्प्रचार फैलाएर देशमा राजनीतिक अराजकता सिर्जना गर्न खोजेको आरोप बीजेपीले लगाएको छ। उत्तर प्रदेशका मन्त्री नरेन्द्र कश्यपले इन्डिया गठबन्धन चुनावी मैदानमा अलग-अलग लड्ने भएकाले उनीहरूको एकता देखावटी मात्र भएको र दिल्लीका जनतालाई दुःख दिने काम मात्र गरेको टिप्पणी गरेका छन् 

दिल्लीमा ठूलो संख्यामा मानिसहरू भेला भएकाले सुरक्षाका लागि व्यापक प्रहरी परिचालन गरिएको छ र दिल्ली ट्राफिक प्रहरीले विभिन्न स्थानमा सवारी साधन मोड्ने (डाइभर्ट गर्ने) र नियन्त्रण गर्ने व्यवस्था मिलाएको छ ।