१९ भदौ, काठमाडौं । एसिया कपमा उत्कृष्ट प्रदर्शन गरेका नेपाली खेलाडीलाई भारतका स्टार खेलाडी र कोचले मेडल लगाईदिएका छन् । नेपाल भारतबीचको खेल सकिएपछि ड्रेसिङ रुममा नेपालका ओपनर आसिफ शेख, अलराउण्डर सोमपाल कामी र दिपेन्द्रसिंह ऐरीलाई भरतीय खेलाडी र प्रशिक्षककले मेडल लगाईदिएका हुन् । 

भारतका स्टार ब्याटर विराट कोहलीले आसिफ शेखलाई, हार्दिक पाण्ड्याले सोमपाल कामीलाई र प्रशिक्षक राहुल द्रविडले दिपेन्द्रसिंह ऐरीलाई मेडल लगाईदिएका थिए । 

नेपाली क्रिकेट टोलीको प्रशिक्षकमा मोन्दी देसाई नियुक्त भएसँगै उनले ड्रेसिङ रुमलाई ह्यापी बनाउनुपर्ने भन्दै उत्कृष्ट प्रदर्शन गर्ने खेलाडीलाई मेडल लगाईदिन सुरु गरेका छन् । सोही अनुसार प्रशिक्षक मोन्दी देसाईले भारतका खेलाडी र प्रशिक्षकको हातबाट नेपाली खेलाडीलाई मेडल लगाईदिएका हुन् । 

श्रीलंकाको पालेकेले क्रिकेट रंगशालामा टस हारेपछि ब्याटिङमा उत्रेको नेपालले उत्कृष्ट प्रदर्शन गरेको थियो । नेपालले ४८ दशमलव दुई ओभरमा सवै विकेट गुमाउँदै दुई सय ३० रन बनाएको थियो । नेपालका लागि आसिफ शेखले ५८, सोमपाल कामीले ४८, कुशल भुर्तेलले ३८, दीपेन्द्रसिंह ऐरीले २९ र गुल्सन झाले २३ रन बनाएका थिए । 

दुई सय ३१ रनको विजयी लक्ष्य पछ्याउने क्रममा खेलमा बर्षा बाधक बनेपछि निर्धारित ५० ओभरको खेललाई छोटयाएर २३ ओभरमा झारिएको थियो । तर खेलको दोस्रो इनिङमा नेपालले राम्रो प्रदर्शन सकेन । एक सय ४५ रनको नयाँ लक्ष्य प्राप्त गरेको भारतले बिना कुनै विकेट २० दशमलव एक ओभरमा पूरा गर्यो । 

खेल हारेपनि उम्दा प्रदर्शन गरेका नेपाली खेलाडीको सर्वत्र प्रशंसा भईरहेको छ ।