दुःखसँग लड्दै ९९ वर्षे खड्का दम्पती

१९ भदौ, म्याग्दी - उमेरले एक सय वर्ष टेक्नै लागेका म्याग्दी बेनी –२ बगरफाँटका खड्गबहादुर थापासँग के छैन ? स्वस्थ शरीर छ । हँसिलो मुहार छ । लौरो टेक्दै भए पनि गाउँघर घुम्न सक्ने शरीरमा तागत पनि छ । त्योभन्दा बढी अनुभवले खारिएको स्वस्थ मस्तिष्क छ । राणाशासनदेखि पञ्चायती व्यवस्था र बहुदलीय व्यवस्था हुँदै गणतन्त्रसम्म आइपुग्दाका साक्षी उनीसँग सबथोक भए पनि जीवनभर ‘सुख’ भने जहिल्यै उनीबाट टाढै बस्यो ।

Watch On

बगरफाँटमा भाइको गोठमा चौरासी वर्षे श्रीमती खिरकुमारी थापासँगको जीवन गुजारा सरकारले दिने सामाजिक सुरक्षा वापतको भत्ता र केही मनकारीले दिने सहयोगले धानेको छ । छोराछोरी र नाती नातीना र पतानी पुस्तासँग खेल्दै रमाउने उमेरमा उनीहरुको साथ छैन । 

बुढेसकालको साहरा बन्नुपर्ने छोरा मीनबहादुर ४२ वर्ष अघि नै परलोक भइसकेका छन् भने बोल्न नसक्ने एक मात्र छोरी बेनीको तोराखेतमा भएकाले आइरहन पाउँदिनन् । उसो त शरीरमा दीर्घरोग नभए पनि यी दम्पती कहिलेकाँही बिरामी हुँदा निकै दुःख पाउने गरेको छिमेकी टेकबहादुर कार्की बताउँछन्। 

‘भाइको गोठमा जसोतसो उनीहरुको गुजारा चलिरहेको छ, बिरामी हुँदा अलिक बढी समस्या हुन्छ’, उनले भने, ‘तर पनि आफन्त, इष्टमित्रको सहयोग भइरहेको छ ।’ तर बिरामी भएकै कारण ठूलो उपचार भने गर्नु परेको छैन ।

दम्पतीको दैनिकी सामान्य व्यक्ति जस्तै गरी बित्छ । आगो बाल्न दाउरा र झिँजा बटुल्नै पर्यो भने बाँच्नका लागि खाना खानै पर्यो । त्यसका लागि सरकार र केही संस्थाको सहयोग भइरहेकोमा उनले खुसी व्यक्त गरे ।

बिहानै उठेर नित्य कर्म गरी भगवानको आरधना गर्ने थापाको पुरानै बानी हो । त्यसपछि लठ्ठी टेक्दै गाउँ डुल्ने र इष्टमित्रले दिएका अन्न, तरकारी, दूध–दही ल्याउने उनको काम हो । दिउँसोको समयमा छिमेकीसँग ठट्यौली पारामा कुरा गर्ने र सबैलाई हसाउने बानीले पनि उनलाई स्वस्थ राखिरहेको छिमेकी पदमपाणी शर्माको भनाइ छ । 

जीवनको उत्तरार्धतिर आइपुग्दा पनि उनीमा बाँच्ने चाहना अझै सकिएको छैन । उनलाई आफू अझै १० वर्ष बाँच्छु भन्ने आत्मविश्वास ज्यूँदै छ । ‘लिएर आएको कर्म नभोगी कसैलाई छुट छैन’, थापाले भन्छन्, ‘सम्पत्ति कमाएँ अर्कैलाई भयो, अहिले सम्पति खाने मान्छेले फर्केर पनि हेर्दैनन् ।’ ज्योतिषीले एक सय १० वर्षको आयु बताएको भन्दै ठट्यौली शैलीमा उनी भन्छन्, ‘मर्दिन सानोतिने रोगले, बरु भोकै मरुँला रोगले मलाई लैजाँदैन ।’

थापा दम्पतीलाई समय समयमा बेनीमा रहेका सङ्घसंस्था र व्यक्ति तथा मनकारी गाउँलेबाट पनि लत्ताकपडा, खाद्यान्न तथा नगद सहयोग हुने गरेको छ । कसैलाई तीतो बचन नबोल्ने र आफ्ना दुःख सितिमिति अरुलाई नदेखाउने स्वभावका थापाप्रति गाउँलेहरु दीर्घजीवन र आरोग्यताको कामना गर्ने गरेका छन् ।