नुवाकोटका बाढीपीडितलाई युगान्डाबाट आएका नेपालीको सहयोगमा बाँडियो राहत

नुवाकोट ।  नुवाकोटको देवीघाट र ढुङ्गे क्षेत्रका बाढीपीडित परिवारलाई ग्यास सिलिन्डर, चुलो, टेन्टलगायत राहत सामग्री वितरण गरिएको छ।

Watch On

युगान्डाबाट नेपाल आएका नेपाली तथा गैरआवासीय नेपाली संघ (एनआरएनए) युगान्डालगायतको सहयोगमा संकलन गरिएको राहत सामग्री सम्बन्धित वडा तथा नगरपालिकासँगको समन्वयमा प्रभावित परिवारलाई वितरण गरिएको हो।

राहत वितरण अभियानमा एनआरएनए युगान्डाकी अध्यक्ष रमा अर्याल, प्रेमबहादुर श्रेष्ठ, सीता श्रेष्ठ, बिमला कार्कीलगायत सामाजिक अभियन्ता तथा सहयोगीहरूको सक्रिय सहभागिता रहेको थियो।

अभियानअन्तर्गत करिब ३०० थान ग्यास सिलिन्डर, चुलो तथा टेन्टलगायत आवश्यक सामग्री प्रभावित परिवारलाई उपलब्ध गराइएको जनाइएको छ।

बाढी तथा प्राकृतिक विपत्तिबाट प्रभावित परिवारलाई तत्काल आवश्यक पर्ने सामग्री उपलब्ध गराउने उद्देश्यले अभियान सञ्चालन गरिएको आयोजकले बताएका छन्। स्थानीय तह तथा सम्बन्धित वडासँगको समन्वयमा वास्तविक प्रभावित परिवार पहिचान गरी राहत सामग्री वितरण गरिएको उनीहरूको भनाइ छ।

विपद्को समयमा देश तथा विदेशमा रहेका नेपालीबीचको सहकार्य र मानवीय सहयोगले प्रभावित परिवारलाई ठूलो राहत पुगेको स्थानीयले बताएका छन्। उनीहरूले युगान्डाबाट आएका नेपाली, एनआरएनए युगान्डा तथा सहयोग गर्ने सबैप्रति आभार व्यक्त गरेका छन्।