न्यूरोडकाे सडकमा पार्किङ गर्न पाउनुपर्छ भन्दै आन्दोलन गर्नेले फुटपाथ बढाउँदा विरोधमा उत्रीए : बालेन

काठमाडाैँ । काठमाडौँ महानगरपालिकाका मेयर बालेन शाहले न्यूरोडको पिच सडकमा पार्किङ हटाउने महानगरको निर्णयको विरोधमा उत्रिने जनप्रतिनिधि नै सोही स्थानमा फुटपाथ बढाउँदा विरोधमा उत्रिएको बताएका छन् । मेयर शाहले शुक्रबार बसेको महानगरको कार्यपालिका बैठकपश्चात सो विषय फेसबुकमा लेखेका हुन् । 

शुक्रबार बिहान बसेको कार्यपालिका बैठकमा काठमाडौँ महानगरपालिका वडा नं २२ का वडाध्यक्ष चिनीकाजी महर्जनले न्यूरोड क्षेत्रमा फुटपाथ बढाउन नपाउने भन्दै विरोध गरेपछि मेयर शाह र वडाध्यक्ष महर्जनबिच सवालजवाफ भएको थियो । कार्यपालिका बैठक सकिनासाथ मेयर शाहले लेखेका छन्, ‘एउटा रोचक कुरा पढ्नुहुन्छ ? न्यूरोडमा जसले सडकमा पार्किङ गर्न पाउनुपर्छ भनेर आन्दोलन गरेका थिए, तिनैले अहिले ३ फिट फुटपाथ बढाउँदा बिरोध गरिरहेका छन् ।’

त्यस्तै उनले सडकको पिच ढाकेर पार्किङ गर्न पाउनुपर्ने भन्दै विरोध गर्नेले अहिले सोही पार्किङ गरेको सडकमा फुटपाथ बनाउँदा विरोधमा उत्रिएको बताएका छन् । ‘सोच्नु त, सडकमा ३ फिट भन्दा बढि ढाकेर पार्किङ गर्दा सडक सानो भएर न्युरोडको सडकमा गाडी कुद्न साँघुरो नहुने तर त्यहि पार्किङले ओगट्ने ठाउँ खाली गराएर फुटपाथ बनाउँदा सडकमा गाडी कुद्नै साँघुरो हुने कसरी हुन्छ ?’, मेयर शाहले प्रश्न गरेका छन् । 

त्यस्तै उनले सडक विभागले बनाएको मापदण्ड अनुसारनै आफूहरुले फुटपाथ बनाउन लागेका कारण आफूहरुसँग प्रतिशोध नलिन भनेका छन् । मेयर शाहले वडाध्यक्षलाई प्रतिशोध लिने भए विकास रोक्नेहरूसँग, कागजमा वैज्ञानिक कुरा लेखेर व्यवहारमा कमिसन बढाउन खोज्नेहरूसँग, फुटपाथ बढाउन रोकियो भने अहिले यो गइहाल्छ, पछि फेरि पार्किङबाट कमाउन पाइन्छ भन्ने सोचेर न्युरोडलाई लथालिङ र अव्यवस्थित बनाउनेहरूसँग लिन भनेका छन् ।