विरोधका लागि विरोध हो, सरकारले विपद् व्यवस्थापनमा उल्लेख्य काम गरेको छ : प्रधानमन्त्री ओली

काठमाडाैँ । प्रधानमन्त्री केपी शर्मा ओलीले सरकारले विपद व्यवस्थापनमा उल्लेख्य भुमिका निभाएको बताएका छन् । अमेरिकी भ्रमण सकेर नेपाल फर्किएका उनले त्रिभुवन अन्तर्राष्ट्रिय विमानस्थलमा पत्रकारसँग कुराकानी गर्दै सरकारले विपद्को समयमा केही गरेन भन्नु विरोधका लागि विरोध भएको बताएका हुन् । 

पत्रकारसँग कुराकानी गर्ने क्रममा एक पत्रकारले ‘विपद्को समयमा सरकारले काम गरेन भन्ने चौतर्फी आलोचना भइरहेको छ, यसबारे के भन्नुहुन्छ ?’ भन्ने प्रश्नमा प्रधानमन्त्री ओलीले त्यो विरोधका लागि विरोध भएको बताएका छन् । ‘विरोधका लागि विरोध होला । सरकारले गर्ने सम्मको प्रयास, तत्काल मिटिङ बसेर, तत्काल सेना, प्रहरी खटाएर, उद्दार कार्य गरेको छ ।’, प्रधानमन्त्री ओलीले भने, ‘बाढी आउने कुरालाई त रोक्न सकिँदैन थियो, उद्दार गर्ने कुरा हो, राहत पुर्याउने कुरा हो । पहिरो जाने कुरा पनि पूर्वसूचना गरेर जाँदैन । पहिरो गएपछि क्षति पुर्याउने हो । त्यसमा सरकारले तदारुकताका साथ उद्दार कार्य र राहत पुर्याउने हो । त्यो काम पुर्याएको छ भन्ने मलाई लाग्छ ।’

त्यस्तै पत्रकारको तपाईँको भ्रमणले देशले के पायो भन्ने प्रश्नमा उनले आफू भैँसी दुहुन गएजस्तो नभएको व्यंग्यात्मक प्रतिक्रिया दिएका छन् । ‘म कुनै भैँसी दुहुन गएर दुघ लिएर आएजस्तो हैन । हाम्रा विचारहरु, हाम्रा समस्याहरु त्यहाँ राख्न गएको हो, राखियो । त्यस्तै यी समस्याहरु एकल समस्या नभई ग्लोबल्ली समस्या हुन्, यसलाई ग्लोबल्ली मिलेर समाधान गर्नुपर्छ भन्ने कुरा भयो ।’, प्रधानमन्त्री ओलीले भने । 

त्यस्तै उनले भारतीय प्रधानमन्त्री नरेन्द्र मोदीसँगको भेटका क्रममा दुई देशबिचको सम्बन्ध कसरी राम्रो बनाउने भन्ने विषयमा छलफल भएको बताएका छन् ।