फ्लाइ दुबई उडान घटना:  आक्रमण गरेर दुर्घटना गराउन खोज्ने को पाइलटबारे नयाँ तथ्य सार्वजनिक

काठमाडौँ । दुबईबाट इजरायलको तेल अविवतर्फ जाँदै गरेको उडानका क्रममा आफ्नै सह-पाइलटमाथि चक्कु प्रहार गरी विमान नियन्त्रणमा लिने प्रयास गर्ने व्यक्तिको ‘इस्लामी कट्टरपन्थी विचारबाट ब्रेनवाश’ गरिएको सङ्केत मिलेको इजरायलका प्रधानमन्त्री बेन्यामिन नेतान्याहुले दाबी गरेका छन् ।

Watch On

फक्स न्युजसँग कुराकानी गर्दै प्रधानमन्त्री नेतान्याहुले ओमानका नागरिक रहेका ती आक्रमणकारीले "विमान खसाल्ने निश्चित प्रायः प्रयास" गरेको बताए ।

प्राप्त विवरण अनुसार बुधबार फ्लाईदुबईको विमान उडान भरेको करिब दुई घण्टापछि अचानक आकाशमै १७ हजार फिट (५,२०० मिटर) भन्दा बढी तल झरेको थियो ।

सह-पाइलटले मुख्य पाइलटमाथि चक्कु प्रहार गरेलगत्तै विमानमा सवार यात्रु र क्रु सदस्यहरूले तत्परता देखाएका थिए । उनीहरूले आक्रमणकारीलाई नियन्त्रणमा लिएर बाँधेपछि विमानको नियन्त्रण पुनः सम्हाल्न सफल भएका थिए । तत्पश्चात् विमानलाई साउदी अरबमा सुरक्षित रूपमा संकटकालीन अवतरण गराइएको थियो । 

नेतान्याहुका अनुसार नियन्त्रणमा लिइएपछि ती व्यक्तिले एयरक्रुलाई "मलाई मारिदेऊ, मलाई मारिदेऊ" भनिरहेका थिए । यसले उनी आत्मघाती हमलाको उद्देश्यमा रहेको प्रस्ट हुने इजरायली प्रधानमन्त्रीको भनाइ छ ।

घटनापछि विमान साउदी अरबमा अवतरण गराइएकाले हाल साउदी अधिकारीहरूले ती आरोपी सह-पाइलटसँग हिरासतमा लिएर सोधपुछ गरिरहेका छन् ।

यसैबीच, संयुक्त अरब इमिरेट्स (यूएई) को सरकारी समाचार एजेन्सीले पनि घटनाको व्यापक अनुसन्धान सुरु गरिएको जनाएको छ । यो घटना कुनै आतङ्कवादी गतिविधि वा सङ्गठित उद्देश्यसँग जोडिएको छ कि छैन भन्नेबारे अनुसन्धान केन्द्रित गरिएको छ ।

यद्यपि, आक्रमण भएको विमान यूएईमा दर्ता भई उसैको झण्डामुनि उडान भरिरहेकाले यस घटनाको मुख्य कानुनी क्षेत्राधिकार आफूसँग रहेको दाबी यूएईका अधिकारीहरूले गरेका छन् ।

नेतान्याहुले घटनाका प्रारम्भिक सङ्केतहरू इस्लामी कट्टरपन्थी सोचतर्फ लक्षित भए पनि अहिले नै कुनै अन्तिम निष्कर्षमा नपुगिसकिएको र अनुसन्धान जारी रहेको स्पष्ट पारेका छन् ।