१६ असोज, काठमाडौं । श्रीमान हत्याराले आमामाफी पाएपछि नेपालगञ्जकी भारती मानन्धर न्याय खोज्दै काठमाडौं आएकी छिन् । आज पत्रकार सम्मेलन गर्दै उनले श्रीमान्को हत्याराको कैद मिनाहा दिएर न्याय माग्ने ढोका समेत बन्द गरेको बताइन् । 

उनले सोही क्रममा राष्ट्रपतिलाई प्रश्न गर्दै मेरो ठाउँम तपाईंको छोरी भएको भए के गर्नुहुन्थ्यो भन्दै प्रश्न गरेकी छिन् । ‘यत्तिका वर्ष भयो, सबैले बिर्सिए होला तर मैले विर्सन सक्दिन । त्यो घटना सम्झदा मरेसरी सोच्छु । मेरो जानुलाई जब खुँडा लागेको थियो कति पीडा भयो होला ? कति तड्पिनुभयो होला ? कति रुनुभयोहोला ?’ उनले भनिन्, ‘ त्यसरी हत्या गर्ने मान्छेलाई आम माफी दिने अधिकार राष्ट्रपतिलाई कसले दियो ? मेरो ठाउँमा उहाँको छोरी हुन्थ्यो भने उहाँले के गर्नुहुनथ्यो । मेरो जस्तै रोइकराई गर्नुपर्ने अवस्था गराउनुहन्थ्यो ? यस्तो दिन देखाउनुहुन्थ्यो आफ्नो छोरीलाई ?’

उनले थपिन्, ‘हाम्रो कानून यस्तो भएसकेछ आफ्नो न्यायको लागि अदालत जाने अधिकार समेत छैन । सरकार बनाउने, मन्त्री बनाउने हामी आम जनता अनी त्यही जनता पीडामा परेको किन हेर्दैन सरकार ?’

के थियो घटना ?

२०७२ सालमा भारतीका श्रीमान चेतन मानन्धर नेपालगञ्जमा सानातिना ठेक्कापट्टाको काम गर्थे । होटल चलाउन सुरु गरेका थिए । सो समयमा चेतन र रिगल भनिने योगराज ढकाल साथी थिए । रिगललाई चेतनले दाइ भन्थे । रिगल तरुण दलका क्षेत्रीय सभापति थिए । पहिला रिगलसँगै हिँड्ने चेतन नेकपा एमालेसँग नजिकिएपछी रिगलसँग रिसिइबी सुरु भएको थियो ।

त्यस समयमा रुपडियातिर नेपाल र भारतबीच अवैध रुपमा बस चल्न थालेका थिए । तिनै बस सञ्चालन गर्ने विषयमा रिगल र चेतन बिच मनमुटाव भएको थियो । हत्या भएको केही दिन अघि मात्र रिगल र चेतन सँगै काठमाडौँ आएका थिए । श्रीमती भारतीका अनुसार नेपालगञ्ज फर्किएपछी चेतन निकै तनावमा थिए । 

साँझको समय, खाना खाने तरखर गर्दैगर्दा रिगलले चेतनलाई अर्को दिन सुर्खेत रोडमा भेट्न बोलाए । भोलिपल्ट मोटरसाइकलमा रिगललाई भेट्न हिँडेका चेतनलाई सुर्खेत रोड नपुग्दै रिगलको समुहले खुँडा प्रहार गरी हत्या गर्यो । हत्यापछि बाँके प्रहरीले ११ जनालाई पक्राउ गरेपनि मुख्य योजनाकार रिगल भने फरार रहेका थिए । 

हत्या गरेर ३ वर्षसम्म फरार भएका रिगल २०७२ भदौ २ मा बाँके जिल्ला अदालतमा आत्मसमर्पण गर्न पुगे । केन्द्रिय अनुसन्धान ब्युरो (सिआईबी)ले गुण्डागर्दीविरुद्ध इन्काउन्टरको अभियाननै चलाएपछी रिगलले आत्मसपर्ण गरेका थिए । 

२०७६ वैशाखमा जिल्ला अदालत बाँकेका न्यायाधीश विष्णु सुवेदीले सर्वस्वसहित जन्मकैदको सजाय सुनाएका थिए । रिगलले २०८० भदौ सम्म ४० प्रतिशत मात्रै सजाय भुक्तानी गरेका थिए । असल चालचलन भएको भन्दै संविधान दिवसका दिन नेपाल सरकारको सिफारिसमा राष्ट्रपति रामचन्द्र पौडेलले ६० प्रतिशत कैद मिनाहा गरेका थिए ।