झापा । पार्टी सभापति रवि लामिछानेमाथि भएको धरपकडको विरोधमा रास्वपाले देशैभर प्रदर्शन गरिरहेको छ । र्याली र कोणसभा सहित बिभिन्न स्वरूपका कार्यक्रमहरू गरिरहेको रास्वपाले झापामा भने पृथक शैलीमा विरोध प्रदर्शन गरेको छ ।

बहुचर्चित गिरीबन्धु टि स्टेटको मुख्य गेटबाट रास्वपा झापाले निलो क्रान्तिको सुरुवात गरेको हो । वर्तमान सत्ता गठबन्धन बनाउन महत्वपूर्ण भूमिका खेलेको एक काण्डको गेटैबाट सरकार र त्यसको नेतृत्व कर्ताहरूलाई खबरदारी गरेको रास्वपा झापाले जनाएको छ ।

२ किलोमिटरको ¥यालीपछि बुट्टाबारीमा रहेको टीस्टेटको मुख्य गेट अगाडि रास्वपाले खबरदारी सभा गरेको थियो । सभालाई सम्बोधन गर्दै रास्वपा झापाका उपसभापति प्रकाश पाठकले गिरीबन्धु र भुटानी शरणार्थीको नाजायज सम्बन्धबाट जन्मिएको वर्तमान सरकार, जनताको नभई माफिया र घुसखोरीको सरकार भएको आरोप लगाए । जनमुखी सरकार जनताको मुद्दामा केन्द्रित हुने भन्दै उनले रवि लामिछानेमाथिको दमनको मूल्य सरकारले चुकाउनु पर्ने बताए । 

खालिदा जियामाथिको दमन र प्रतिशोधको मूल्य शेख हसिनाले चुकाउनु परेको उल्लेख गर्दै पाठकले त्यसका लागि रातो क्रान्तिमा होमिनु पर्ने समय समेत नजिकिएको उल्लेख गरे । 

विरोध सभालाई सम्बोधन गर्दै रास्वपा झापाका नेता प्रेम खनालले भ्रष्ट सरकारले आफ्ना नेताका काण्ड लुकाउन रवि लामिछानेलाई पक्राउ गरेको बताए । आफ्नो भाग खोस्न जन्मिएको मात्र नभई आफूहरूले ३ दशकदेखि गर्दै आएको हालिमुहाली सकिने आँकलनसहित काँग्रेस एमालेका नेता आत्तिएको जिकिर गरे ।

प्रधानमन्त्री हुन लायक नभएको व्यक्ति कार्यकारी पदमा पुग्नु नै नेपाल र नेपालीको दुर्दशा भएको उनको टिप्पणी थियो । रास्वपा कोशी प्रदेश इन्चार्ज ओमनाथ भण्डारीले असली भ्रष्टलाई राज्यले संरक्षण गर्दै जागिरे व्यक्तिलाई पक्राउ गर्नु हाँस्यास्पद भएको बताए ।