विराटनगर । नेकपा एमालेका  सांसद तथा लेखा समितिका सभापति ऋषिकेश पोखरेल जोडिएको मोरङको उमागौरी कृषि सहकारी संस्थाको ठगी प्रकरणमा १० जना विरुद्ध पक्राउ पुर्जी जारी भएको छ । जिल्ला अदालत मोरङले सहकारी संस्थाको वर्तमान सञ्चालक समितिका ७ र लेखा सुपरिवेक्षण समितिका ३ गरी १० जनाविरुद्ध पक्राउ अनुमति दिएको मोरङ प्रहरीका प्रवक्ता डीएसपी वेदप्रकाश जोशीले जानकारी दिए । 

प्रहरीका अनुसार सहकारी ठगी प्रकरणको अनुसन्धानका लागि सहकारीका वर्तमान अध्यक्ष धनपालथान–४  घर भइ विराटनगरको शान्ति चोक बस्दै आएका शम्भुप्रसाद रौनियार, सहकारीका उपाध्यक्ष कटहरी गाउँपालिका–२ का लक्ष्मण साह, सचिव धनपालथान–४ का आलम अन्सारी मियाँ र कोषाध्यक्ष धनपालथान–४ का शम्भुप्रसाद सिंह विरुद्ध पक्राउ पुर्जी जारी भएको छ । यसैगरी सञ्चालक समितिका सदस्यहरु जहदा गाउँपालिका–४ का आमोद मण्डल, धनपालथान–४ का रोशन राजवंशी तथा धनपालथान–२ का जितमान ठाकुरविरुद्ध पनि पक्राउ पुर्जी जारी भएको छ ।

लेखा समितिका संयोजक धनपालथानका विजयकुमार यादव तथा सदस्यहरु सुरेन्द्रकुमार राजवंशी र अशोककुमार विश्वासविरुद्ध पनि पक्राउ पुर्जी जारी भएको छ ।

तर यहि सहकारीको ठगी प्रकरणमा जोडिएकी संघीय संसदको सार्वजनिक लेखा समिति सभापति तथा एमाले नेता पोखरेलकी पत्नी अञ्जला कोइरालाका विषयमा भने अहिलेसम्म पक्राउ पुर्जी जारी नभएको प्रहरीले जनाएको छ ।  सहकारी संकटमा परेपछि कोइरालाले २०७८ माघ ५ गते  सहकारीबाट राजीनामा दिएकी थिइन् । उनी अहिले कालोसूचीमा छिन् ।

सहकारी सञ्चालक स्यंम सांसद पोखरेल नै भएपनि कागजीरुपमा भने उनले श्रीमतीको नाम राखेको सहकारीकै अन्य संचालक तथा सदस्यहरुले बताउँदै आएका छन् ।