ताप्लेजुङमा केबलकार निर्माण विवाद : बिहानैदेखि झडप, तीनजना घाइते

काठमाडाैँ । ताप्लेजुङको प्रसिद्ध धार्मिकस्थल पाथीभरामा केबलकार बनाउने विषयमा झडप हुँदा ३ जना घाइते भएका छन् । पाथीभरा मन्दिर जाने बाटोमा केबलकार बनाउने र नबनाउने विषयमा विवाद चर्किँदा २ पक्षबिच झडप भएको हो । झडपमा परि ३ जना घाइते भएका छन् ।

Watch On

पाथीभरा देवी मन्दिर जानका लागि केबलकार निर्माण गर्न ४ वर्षअघि नै निर्णय भएपनि विवादका कारण हालसम्म सो क्षेत्रमा केबलकार बनेको छैन । शुक्रबार निर्माणको जिम्मा पाएको कम्पनी शिलान्यासका लागि सो क्षेत्रमा पुगेपछि दुई पक्षबिच झडप भएको हो । 

सो क्षेत्रमा एकपक्षले पुर्खाहरुले आफूहरुको पहिचान जोगाएको र अहिले आएर सो पहिचान मास्न खोजिएको भन्दै केबलकार बनाउन नदिने अडानमा छन् भने अर्को पक्ष मन्दिर जानका लागि केबलकार निर्माण गर्नुपर्ने अडानमा छन् । 

पहिचान पक्षधरहरुले प्रकृति मासेर धार्मिक स्थलमा विकास गर्न नहुने भन्दै नाराबाजीमा उत्रिएका छन् । यसअघि पनि उनीहरुले विभिन्न समयमा विभिन्न सरोकारवाला निकायलाई ज्ञापनपत्र बुझाउँदै आएका थिए । 

यहि विषयलाई लिएर शुक्रबार बिहानैदेखि विवाद सिर्जना भएको हो । विवाद झडपमा परिणत हुँदा सो क्षेत्रमा ठूलो संख्यामा सुरक्षाकर्मी परिचालन गरिएको छ । 

पाथीभराको काफ्लेपाटी भन्ने स्थानबा मन्दिरसम्म केबलबार बनाउन पाथीभरा दर्शन केबलकार प्रालिले अनुमति पाएको थियो । २ अर्ब ५५ करोड लागत अनुमान गरिएको सो केबलकार २.७४ किलोमिटर दूरीमा बन्ने छ ।