मानव तस्करीमा जोडिएका निवर्तमानमन्त्री अधिकारीलाई कागजात किर्तेमा अनुसन्धान हुने

काठमाडौं । मानव तस्करीको आरोपमा मुछिएका कोशीका निवर्तमानमन्त्री लिलाबल्लब अधिकारीलाई दिउसो २ बजे काठमाडौँ ल्याउन लागेको प्रहरीले जनाएको छ । काठमाडौँ प्रहरी परिसरका अनुसार विराटनगरमा पक्राउ परेको अधिकारीलाई विमान मार्फत काठमाडौँ ल्याउन लागिएको हो । नेकपा एमालेका तर्फबाट मोरङ २-ख बाट निर्वाचित उनी कोशी प्रदेशका आन्तरिक मामिला तथा कानुन मन्त्री थिए । मन्त्री भएकै समयमा विचौलियाको सेटिङमै जापानका पुगेका उनले मन्त्रीले गर्नुपर्ने कुनै पनि औपचारिक प्रक्रिया पुरा गरेका थिएनन् ।

Watch On

प्रहरी स्रोतका अनुसार मानव तस्करीमा जोडिएका अधिकारीलाई अनुसन्धान भने कागजात किर्तेमा गर्न लागिएको छ । मानव तस्करी सम्बन्ध अपराधको अनुसन्धान गर्न छुट्टै ब्युरो नै भएपनि उनलाई भने काठमाडौ प्रहरी परिसरले नक्कली कागजात बनाएको आरोपमा अनुसन्धान गर्ने प्रहरीले जनाएको छ ।

अधिकारी सहित जापानमा बोलाउँदै नबोलाइएको कार्यक्रममा गएका अन्य तीनजनाकाे बयानका आधारमा उनलाई पक्राउ गरिएको प्रहरी परिसर काठमाडौँका एसएसपी बसन्त रजौरेले जानकारी दिए ।

नक्कली कागजात बनाई जापान छिर्न खोजेपछि जापानको अध्यागमनले मन्त्री सहित ४ जनालाई डिपोर्ट गरेको थियो । अन्य तीनजना विमानस्थलबाटै पक्राउ परे पनि अधिकारी भने फुत्तिएका थिए । तर समाचार तथा सामाजिक संजालमा सरकारको तिव्र आलोचना भएपछि बल्ल उनी माथि अनुसन्धान सुरु भएको हो । उनीसहित जापानबाट फर्किएका प्रदेशको आन्तरिक मामिला मन्त्रालयमा सहायक पदको परिचयपत्र बनाएका कञ्चन देवकोटा, जनक राई र वडा सदस्यको परिचयसहित जापान गएका दावा शेर्पा अहिले हिरासतमा छन् । भने तस्करीको योजना बनाउने वीरबहादुर सुनुवार, महेशविक्रम पाण्डे र जुगल रिजाल पनि पक्राउ परेका छन् ।