काठमाडौँ । नेकपा एमाले निकट विद्यार्थी सङ्गठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) का सचिवमाथि यौन दुर्व्यवहारको आरोप लागेको छ ।सङ्गठनका केन्द्रिय सचिव आर्शीवाद सुवेदीमाथि विदेशी महिलालाई यौन दुर्व्यवहार गरेको आरोप लागेको हो ।

उनी नेपाल स्काउटका केन्द्रीय आयुक्तसमेत हुन् । स्काउटको कार्यक्रममा सहभागी हुने क्रममा उनीबाट पीडित भएको भन्दै एक महिलाले उजुरी गरेकी थिइन । २०८१ कात्तिक १ देखि (अक्टोबर १७ देखि १९) ताइवानमा आयोजित स्काउटको एशिया प्यासिफिक क्षेत्रीय कार्यशालामा नेपाल सहित ११ देशका स्काउट प्रतिनिधिहरू सहभागी थिए । 

सोही कार्यशालामा नेपालका तर्फबाट अर्का एक सहआयुक्त सहित सुवेदी पनि ताइवान पुगेका थिए । सोही कार्यक्रममा सुवेदीले आफ्नो शरीरका संवेदनशिल अङ्गहरू जबरजस्ती छुन प्रयास गरेको भन्दै एक महिलाले विश्व स्काउटमा लिखित उजुरी गरेकी थिइन् । 

स्काउटको दक्षिण एशियाली क्षेत्रीय कार्यालय (एपीआर) मार्फत नेपाल स्काउटमा सो घटना छानबिनका लागि पत्र काटेपछि घटना बाहिरिएको हो ।

‘आयुक्त सुवेदीमाथि यौन दुर्व्यवहारमा छानबिन गर्न लिखित पत्राचार भएको छ,’ स्काउट उच्च स्रोतले सिधाकुरासँग भन्यो । झण्डै दुई साताअघि आएको सो पत्रबारे स्काउटका उच्च तह जानकार भए पनि राजनीतिक दबाबमा घटना लुकाउने प्रयत्न भइरहेको थियो ।  

तर, स्काउटका महिला प्रतिनिधिहरूको दबाबमा  दक्षिण एशियाली क्षेत्रीय कार्यालय (एपीआर) को पत्रपछि नेपाल स्काउटका प्रमुख कार्यकारी अधिकृत रामप्रसाद भट्टराईको नेतृत्वमा घटनाबारे छानबिन गर्न समिति बनाइएको थियो । समितिले सुवेदीको बयान लिएर एपीआरमा पठाइसकेको छ । 

सो विषयमा नेपाल स्काउट खेलकुद मन्त्री तेजुलाल चौधरीलाई यस अघिनै जानकारी गराइए पनि स्काउटकै पदाधिकारीहरूको दबाबमा घटना ढाकछोप गर्न खोजिएको स्रोत बताउँछ । 

स्काउटका महिला आयुक्तहरूको दबाबपछि भने बिहिबार खेलकुद मन्त्री चौधरीकै उपस्थितिमा स्काउटको बैठक बसेको थियो । 

बैठकले सुवेदीलाई स्काउटको आयुक्तको जिम्मेवारीबाट निलम्बन गर्ने र उनीमाथि छानबिन गर्ने निर्णय गरेको छ । आज बसेको नेपाल स्काउटको बैठकले सुवेदीमाथि छानबिन गर्ने निर्णय गरेको स्काउटकी सहप्रमुख आयुक्त इन्दु सुवेदीले बताइन् ।

‘आज माननीय मन्त्रीज्यूको अध्यक्षतामा बैठक बसेको थियो,’ सुवेदीले सिधाकुरासँग भनिन्, ‘छानबिन प्रक्रियालाई सहज बनाउन भन्दै आयुक्त सुवेदीलाई निलम्बन गर्ने निर्णय गरिएको छ ।’

आफ्नो सचिव यौन दुर्व्यवहार आरोपमा मुछिएको बारेमा अनेरास्ववियुले भने कुनै प्रतिक्रिया जनाएको छैन् । 

सिधाकुरासँग कुरा गर्दै आरोपित सुवेदीले आफूमाथिको आरोप स्वीकार गरे । ‘ताइवानको कार्यक्रममा एक स्वयंसेवक युवतीले पछाडिबाट ब्याड टच (खराब छुवाई) गरेको भनी म विरुद्ध आरोप लगाउनु भएको रहेछ’ सुवेदीले भने, ‘यसबारे मैले, म निर्दोष रहेको कुरा लिखित रुपमा राखिसकेको छु ।’

उक्त कार्यक्रममा सार्वजनिक स्थलमा ट्याक्सी चढ्ने क्रममा म बाट त्यस्तो भएको भनी आरोप लगाइएको तर त्यस्तो कार्य आफूबाट नभएको उनले प्रष्ट्याए । कार्यक्रम अवधिभरी आफू अन्य सहभागीहरुसँगै रहेको भन्दै आरोपित सुवेदीले उक्त आरोप कसरी लगाईयो भन्दै आश्चार्य व्यक्त गरे ।