काठमाडाैँ । राष्ट्रिय स्वतन्त्र पार्टीका सभापति रवि लामिछानेलाई राजनीतिक प्रतिशोध साँधिएको भन्दै बेल्जियममा प्रदर्शन भएको छ । स्वतन्त्र प्रवासी नेपाली सम्पर्क मञ्च बेल्जियमले विभिन्न भ्रष्टाचारका प्रकरणलाई लुकाउन रविलाई पक्राउ गरिएको बिहिबार प्रदर्शन गरेको हो । 

संसदीय छानबिन समितिले सहकारी ठगी प्रकरणमा लामिछानेको कुनै संलग्नता नरहेको बताएपनि लामिछानेलाई पक्राउ गर्नु सरकारको स्पष्ट राजनीतिक पूर्वाग्रह भएको उनीहरुको ठहर छ । त्यस्तै सरकारको प्रतिशोधपूर्ण सो कदमलाई गिरीबन्धु, टेरामक्स, भुटानी शरणार्थी, वाईडबडी, र अरबौं को जग्गा दान प्रकरण लाई ओझेल मा पार्न गरिएको षडयन्त्र को रूपमा लिएको स्वतन्त्र प्रवासी नेपाली सम्पर्क मञ्च बेल्जियमले जनाएको । ‘सभापतिज्यू लाई बिना कारण र बिना आधार गिरफ्तार गरेर सहकारीमा डुबेको ८७ अर्ब अपचलन गर्ने लाई उन्मुक्ति दिने षडयन्त्र चलिरहेको छ भन्ने कुरा स्पष्ट बुझ्न सकिन्छ । हामीले यो कदमलाई गिरीबन्धु, टेरामक्स, भुटानी शरणार्थी, वाईडबडी, र अरबौं को जग्गा दान प्रकरण लाई ओझेल मा पार्न गरिएको षडयन्त्र को रूपमा बुझेका छौं ।यसै बिषयलाई लिएर पूर्व उपप्रधान तथा गृहमन्त्री रहिसक्नु भएका एवं सांसद रवि लामिछानेलाई रातारात चितवनबाट पोखरा लगिएको घटनाप्रति हाम्रो घोर आपत्ति रहेको छ ।’, सम्पर्क मञ्चले सार्वजनिक गरिएको विज्ञप्तीमा भनिएको छ । 

त्यस्तै अनुसन्धानका नाममा सरकारले रवि लामिछानेमाथि गरेको अन्यायले नागरिकको नैसर्गिक मानवअधिकार हनन गरेको र सो कदमको औचित्य राज्यले पुष्टि गर्नुपर्ने उनीहरुको धारणा छ । सम्पर्क मञ्चले अनुसन्धानमा साथ दिइरहेको एक लोकप्रिय जनप्रतिनिधिलाई अपराधी जस्तो गरी प्रचार गरिनुका साथै सोही स्तरको व्यवहार हुनु नेपालको संविधानविपरित रहेको बताउको छ ।