काठमाडौँ । सङ्घीय मामिला तथा सामान्य प्रशासन मन्त्री राजकुमार गुप्ताका स्वकीय उपसचिव शिव पटेलले घुसको मोलमोलाइ गरेको संवाद सार्वजनिक भएको छ ।

पर्सा जिल्ला भित्रैको एक पालिकाको प्रमुख प्रशासकीय अधिकृतको सरुवाका लागि उनले गरेको मोलमोलाइको ह्वाट्सएप संवाद सिधाकुराले फेला पारेको छ। 

पर्सा निर्वाचन क्षेत्र नम्बर ३ का सङ्घीय मामिला तथा सामान्य प्रशासन मन्त्री गुप्ताको विश्वास पत्र रहेका पटेलले जिल्ला कै एक पालिकामा कार्यरत कर्मचारीलाई निमित्त प्रमुख बनाउन ७ देखि १० लाख रुपैयाँ लाग्ने बताएका थिए ।

सिधाकुरालाई प्राप्त उक्त संवादमा कोही अर्को व्यक्तिसँग मन्त्रीका स्वकीय पटेलले सहयोग राशीका नाममा घुसको कुराकानी गरेका छन् । पठाउन लागेको पालिकाका मेयरले स्वीकार गरेको खण्डमा पठाउन सकिने भन्दै पटेलले सहयोग रकम कति भनेर ति संवादकर्तालाई सोधेका पनि छन् । 

सरुवाको रेट ७ देखि १० सम्म भनेर रकम कोडमा सङ्केत गरिएको छ । सिधाकुराले गरेको खोजमा सो भनेको ७ देखि १० लाख रुपैयाँ हो । ‘त्यहाँको मेयरले स्वीकार गर्छकी नाई ?’ पटेलले साधेका छन् । जवाफमा अर्का एक संवादकर्ताले भन्छन्, ‘काम गरी दिउँ अनि जाने ठाउँको मेयरको सिफारिस पनि छ, आज म हजुर भएको ठाउँमा सिफारिस लिएर पठाई दिउँ ?’ 

त्यसपछि पटेलले प्रश्न गर्छन, ‘सहयोग राशि ? ’ कर्ताले भन्छन् ‘हुन्छ, त्यो मसँग आउँछ । कति भनु । रवि शङ्कर ठाकुर नामको मान्छे हजुर कहाँ आउँछ मेरो नाम लिएर ।’ पटेलले सोध्छन् ‘रेट त हजुरले थाहा पाइसक्नु भाछ नी ’      

पटेल पर्साको बहुदरमाई नगरपालिकामा २०७९ वैशाखमा भएको स्थानीय चुनावमा एमालेबाट मेयर पदमा निर्वाचन लडेका थिए । तर, जसपाका सिंगासन सा तेलीसँग उनी पराजित भए । 

निर्वाचनमा पराजित भए पनि उनी नगरपालिकामा आफ्नो रबाफ देखाई रहन्थे । तर, २०८१ असार अन्तिम साता केपी ओली नेतृत्वको सरकार बन्दा पटेललाई विश्वास पात्र मान्ने राजकुमार गुप्ता संघिय मामिला तथा सामान्य प्रशासन मन्त्री बने ।

पटेल २०८१ साल श्रावण ९ गते मन्त्री गुप्ताको स्वकीय उपसचिवमा नियुक्त भए । उनै पटेलले २०८१ भदौ १९ गते गरेको घुसको मोलमोलाइ सिधाकुराले प्राप्त गरेको हो । सेप्टेम्बर ४ को दिन १२ः १५ देखि १२ः ५१ सम्मको संवादमा सरुवाको लागि आर्थिक लेनदेनको कुराकानी भएको छ । 

पटेलको सो सम्वादबारे हामीले उनीसँग पटक पटक सत्याता माग गरेका थियौँ । पटेलले सोमबार सो विषयमा आफूलाई अनायसै मुछिएको भन्दै कुराकानी अस्वीकार गरे । आफू प्रतिष्ठित ठाउँमा पहिल्यै नियुक्ति खाइसकेको भन्दै उनले घुसका लागि आफूले कहिल्यै काम नगर्ने दाबी गरे ।

‘म विभिन्न सरकारी निकायमा नियुक्ती खाएर पनि रिटायर्ड भएको मान्छे हुँ । मलाई यस्तो नराम्रो काम गरेर घुस खानु पर्दैन,’ पटेलले सोमबार सिधाकुरासँग भनेका थिए, ‘यो झुट हो । मेरो विरुद्ध अफवाह फैलाइएको हो । म यसका लागि कानुनी उपचारमा जान्छु ।’ 

तर, मंगलबार साँझ सिधाकुराले पुनः उनीसँग यस विषयमा जान्न सम्पर्क गरेको थियो । सिधाकुरासँगको भिडियो सम्वादमा उनले त्यो विषयमा सिधाकुरालाई समाचार नलेख भन्न नसक्ने बताए । ‘त्यो कुरा तीन चार महिना अघिको हो,’ पटेलले आज सिधाकुरासँग भने,‘साथी भाईले आज दुश्मनी साँधे ठिकै छ।’ 

सिधाकुराले पटेलले कुरा गर्ने अर्का मानिसहरुसँग उनको फोन र सम्वाद पनि मागेर हेरेको थियो । जसमा उनको ह्वाटसएप प्रोफाइल भने घुस मागेको प्रोफाइलसँग मिल्ने देखिन्छ ।

पटेलले घुसको कुरा गरेको भनेका व्यक्तिसँग पनि सिधाकुराले सम्पर्क गरेको थियो । तर, उनले सो सम्वादले आफैं फस्ने भन्दै सुरुमा तर्किए । परिचय नखुलाउने सर्तमा उनले सो कुराकानी चार महिना अघि भएको बताए । ‘यो चार महिना अघिको कुुरा हो । भो अहिले यस विषयमा कुरा नगरौँ,’ उनले फोन काटे ।  

यस्तो छ पटेल र स्राेत १(सिधाकुराले गाेप्य राखेकाे )  बीचकाे संवाद 

शिव पटेलः निम्तिमा पठाउन त्यहाँका मेयरले स्वीकार्छ कि ?

स्रोत १: काम गरी दिउँ अनि जाने ठाउँको मेयरको सिफारिस पनि छ, आज म हजुर भएको ठाउँमा सिफारिस लिएर पठाई दिउँ 

शिव पटेलः हुन्छ अनि सहयोग राशि

स्रोत १ :  हुन्छ त्यो मसँग आउँछ, अनि कति भनुँ ? रविशंकर ठाकुर नामको मान्छे हजुर कहाँ आउँछ मेरो नाम लिएर 

शिव पटेलः रेट त हजुर थाहा पाइसक्नु भएछ नी ।  

स्रोत १ : छैन हजुर । 

शिव पटेलः ७ देखी १० सम्म  ।

स्रोत १ : हुन्छ, म त्यही अनुसार कुरा गरुँला, कुरा मिले भने हजुरले फाइनल गर्दिनुपर्ला, त्यो मान्छे आउँदैछ नभए हजुरलाई कुरा गर्न मिले हजुरले नै भने पनि हुन्छ, नभए म छँदै छु । अस्ति मैले पठाको पुलिसको चाहिँ के भयो दाजु ।  

शिव पटेलः ठाकुरलाई मैले भेटेको काम हुन्छ बाँकी कुरो टुंग्याउनु आजै काम अगाडी बढाउँला । 

स्रोत १ : हुन्छ, म कुरा गर्छु, हजुर ५ः५० सम्म मिलाउनु भन्ने कुरा आयो नी त के भनी दिउँ ।  

शिव पटेल : ७ देखि ९ ।

स्रोत १ : आजै अहिले नै म सँग आउँछ । 

शिव पटेल : हजुरले ७ देखि ९ लिएर मलाई जानकारी पाउँ ।