युकेमा नेपाली दलालहरुबाटै ठगिन्छन् नेपाली विद्यार्थी, कामको आश्वासनमा ३० लाखसम्म ठगी 

काठमाडाैँ । अध्ययनका लागि चर्को शुल्क तिरेर युके पुगेका नेपाली विद्यार्थीहरू नेपालीहरूबाटै ठगिने क्रम बढेको छ । 
महङ्गाे कलेज शुल्क, कम काम र न्यून ज्यालाका कारण विद्यार्थी भिसामा युके पुगेका अधिकांश नेपाली विद्यार्थीहरूले आफ्नो भिसा वर्किङमा परिवर्तन गर्न चाहान्छन् । विद्यार्थीको यही समस्यालाई मौका बनाएर युकेका विभिन्न शहरहरूमा स्थापित भइसकेका केही नेपालीले भने धन्दानै चलाएका छन् ।

Watch On

नेपालबाट गएका विद्यार्थीहरूलाई वर्किङ भिसाका लागि स्पोन्सर गरिदिने, भिसा परिवर्तन गराएर कामको समेत ग्यारेण्टी गर्ने भन्दै नेपालीसँग २५ देखि ३० लाखसम्म उठाउने गरेको विद्यार्थीहरूले गुनासो गरेका छन् । 
नेपाली विद्यार्थी ठग्ने धन्दा बनाएका नेपालीहरूले विद्यार्थीहरूलाई पैसा भने नेपालमै नगद दिनुपर्ने शर्त राख्ने गरेका छन्  । उनीहरूले नेपालबाट समेत विद्यार्थी भिसामा बोलाएर वर्किङ भिसामा परिवर्तन गराइदिने भन्दै नेपाली विद्यार्थीहरू बोलाउने गरेका छन् । 

बेलायतबाट सिधाकुराको सम्पर्कमा आएका १५ जना विद्यार्थीहरूले आफूहरू वर्किङ भिसाका लागि स्पोन्सर दिलाइदिने नाममा एउटै समूहबाट ठगिएको गुनासो गरेका छन् । उनीहरूलाई  युकेमै अक्सफोर्ड कन्सल्टेन्सी एनपी लिमिटेड खोली त्यही कम्पनीले स्पोन्सर गरेर भिसा परिवर्तन गराउने भन्दै ठगी गरिएको पाइएकाे छ‍ ।

यसका सञ्चालक मकर गुरुङ र रामनाथ महर्जनले नेपालबाट विद्यार्थीलाई २५ लाख देखि ३० लाख सम्म लिएर युके पुर्याउने र त्यहाँ विद्यार्थी भिसाबाट वर्किङ भिसामा परिवर्तन गराई काम समेत लगाउने भन्दै थप १३ हजार पाउण्ड देखि १६ हजार पाउण्ड (नेपाली करिब ३० लाख) सम्म थप गर्न लगाउने गरेको उनीहरूको गुनासाे छ । उनीहरु पछिल्लो पटक १४ जना विद्यार्थीसँग ३ करोड बढी रकम उठाएर विद्यार्थीबाट सम्पर्कविहिन भएका छन् । 

उनीहरूले  यसअघि युकेमा नै आफूहरूको कम्फर्ट केयर रिक्रुटमेन्ट एण्ड ट्रेनिङ लिमिटेडले वर्किङ भिसाका लागि स्पोन्सर गर्ने भन्दै पैसा उठाउने गरेका थिए । तर त्यहाँ पुगेपछि भने सम्पर्कविहिन भएका छन् ।
उनीहरू थप पैसा तिरेर अन्य कम्पनीहरूमा स्पोन्सर लिई भिसा परिवर्तन गर्न बाध्य भएका छन् । 

कम्पनी सञ्चालक मकर गुरुङ युकेकै नागरिक भैसकेका छन् तर उनले नेपालमा गोरखाको छोप्राक स्थायी ठेगाना भई काठमाडौँ बुढानीलकण्ठ बस्ने  आफ्नी आमा मनमाया गुरुङ र दाइ श्रीप्रसाद गुरुङको खातामा पैसा हाल्न लगाउने गरेका थिए । 

मकर गुरुङले नै युकेमा मासिक ३ लाख २० हजार बढी कमाइ काममा बोलाउने भन्दै अस्मिता थापालाई २७ लाख ठगी गरेको भन्दै मंसिर १९ मा वैदेशिक रोजगारीमा समेत उजुरी परेको छ । अस्मिताका श्रीमान अरुण कार्कीका अनुसार उनले नेपालमा मकर गुरुङ र दाइ श्री प्रसाद गूरुङको खातामा रकम जम्मा गरेको सबै प्रमाण विभागमा बुझाएका छन् । उनका भाईले विभागमा उजुरी दिएका हुन् ।

तर अहिलेसम्म पनि विभागले कुनै प्रक्रिया अघि बढाएको छैन । नेपालमा उनीहरूको खातामा पैसा जम्मा भएपछि युकेमा कम्फर्ट केयर रिक्रुटमेन्ट एण्ड ट्रेनिङ लिमिटेडका नाममा स्पोन्सर लेटरका लागि जब अफर लेटर समेत दिएका थिए । तर उक्त कम्पनीनै अवैध भएको खुलेको छ । 

अहिले भने कम्पनीका मकर गुरुङ र रामनाथ महर्जनले उल्टै पिडितहरुलाई धम्काउन थालेका छन् । एजेन्ट रामनाथले आफूलाई नेपालमा केही गर्न नसक्ने र नेपालमा कानुन प्रक्रिया गरे बेलायतमा अस्मिताका पति अरुणहरुलाई जे पनि गर्न सक्ने भन्दै धम्की दिएका छन् । 
यस विषयमा हामीले मकर गुरुङ र रामनाथ महर्जन दुबैलाई सम्पर्कको प्रयास गरेका थियौँ । दुबैसँग सम्पर्क हुन सकेन् ।
मकर र रामनाथले नेपालबाट लिला गुरुङ,अस्मिता थापा, साधना खेवाह्याङ, स्वेता, सरिता भाट लगायतलाई नेपालबाट बेलायत लैजानका लागि मात्रै २५ देखि ३० लाख रुपैयाँसम्म लिएका छन् । 

यस्तै बेलायतकै विभिन्न शहरमा रहेका सैन लामा, सेजल श्रेष्ठ, ओम, लिजा गुरुङ, विशाल केसी, अरविन गुरुङ, निमा तामाङ, खामिन पुन र सुरुचि लामासँग भने भिसा परिवर्तन गराई काम समेत दिने ग्यारेण्टी भन्दै १३ हजार पाउण्ड देखि १६ हजार पाउण्ड नेपाली करिब ३० लाखसम्म उठाएका छन् । 

तर न उनिहरुले काम पाए, न उनीहरूले पैसा नै फिर्ता पाए बरु अहिले पैसा फिर्ता माग्दा धम्की खेपिरहेका छन् ।  मकर र रामनाथले ठगी गरेका बिद्यार्थीहरुले अहिले आफै काम खोजेर काममा लागेका छन् ।