‘श्रीमति बचाउनु छ, मिल्ने भए मृगौला बेच्ने थिएँ’

काठमाडौँ । बेलमता नेपाली अध्यारो कोठाको खाटमा पल्टिएकी छिन् । उनीसँगै रहेका श्रीमान् खड्के छटपटाउँदै घरी भित्र त घरी बाहिर गरिरहन्छन् । 

Watch On

चिने जानेका नेता देखि आफन्तलाई फोन गर्छन् । श्रीमतिलाई पुनः रोग बल्झिएको कुरा सुनाउँछन् र उपचार लागि काठमाडौँ भएको र पैसाको अभाव भएको भन्दै सहयोगका लागि आग्रह गर्छन् ।  उनीहरु ललितिपुरको सातदोबाटोमा रहेको एक होटलमा अस्थायी बास बसेका छन् । बास बसेको होटल र खानाको पैसा जोहो छैन् । कसरी तिर्ने पत्तो छैन् । 

हरेक १४ दिनमा बेलमतालाई किमो थेरापी गर्नुपर्छ यो कसरी गर्ने भन्ने पनि कुनै उपाय छैन् खड्ग चिन्तित सुुनिन्छन् । ‘दशैं र तिहार यतै बिताइयो । घर आउन जान खर्चिलो छ कसरी आउने जाने ? फेरि उपचारका लागि पनि त खर्च छैन्,’ खड्केले सिधाकुरासँग भने ।  

खड्के नेपालीकाअनुसार बेलमताको आमशयमा पुनः क्यान्सर बल्झिएको छ ।

उनका अनुसार दुुई वर्ष अघि देखिएको क्यान्सर पहिचान पछि ललितपुरको बीएण्डबी अस्पतालमा उपचार गरिएको थियो । पहिलो चरणको क्यान्सरको अप्रेशन पछि उनीहरु घर फर्किए । चिकित्सकले पटक पटक फलोअप गरिरहनुपर्ने बताएका थिए ।

तर, आर्थिक अभाव र गरिबीले त्यो सम्भव भएन ।  रुकुम फर्किए पछि खड्केलाई श्रीमतिको उपचारको ऋण तिर्न हम्मे भयो । जग्गा त्रितो राखेर स्थानीयसँग लिएको ५ लाख ६५ हजार ऋण तिर्न ताकेता भएपछि खड्ग कमाई गर्न  भारत हिँडे । 

घरमा भएकी बेलमताको नियमित फलोअप छुटेपछि पेट फुल्ने र दुख्ने हुन थाल्यो । भारतबाट खड्के गाउँ फर्किए र थप जचाउँन काठमाडौँ आउँदा रोग बल्झिएको पुुष्टी भयो । 

उनीहरु दशैं अघि नै काठमाडौँ आएका थिए । पाटन अस्पतालको स्वास्थ्य परिक्षणमा क्यान्सर पुुष्टी भएपछि अहिले किमो थेरापी चलिरहेको खड्के बताउँछन् ।

थप उपचार र परिक्षण पनि पाटनमै चलिरहेको तर आर्थिक अभावले पिरोलेको उनी सुनाउँछन् । ‘आफ्नो बलबुुँताबाट गर्न सकिने सबै गरियो । वडा, गाउँपालिका, प्रदेश सरकार सबैबाट पाउने सुबिधा पनि लियौँ तर पुुगेन,’ खड्केले भने । 

श्रीमतिको उपचारकै सिलसिलामा घरमा भएको आम्दानी सकिएको उनी बताउँछन् । जग्गा जमिन पनि बन्दकी राखेर यस अघिको उपचार भएको तर अहिले कटिन भएको उनी सुनाउँछन् । 

‘मिल्ने भए मेरो मृगौला बेचेर भए पनि उपचार गर्ने थिएँ श्रीमतिको । केही वर्ष भए पनि उसलाई बचाउन मन छ मलाई’ खड्केले भने ।

उपचारका लागि भइपरिआउने खर्च अभाव भएपछि उनले मनकारीहरुलाई सहयोगका लागि अपिल पनि गरे । श्रीमति बेलमतिको उपचारका लागि उनले लक्ष्मी बैंकमा रहेको आफ्नो खातामार्फत सहयोग गरिदिन पनि उनले आग्रह गरे । 

अहिले एक किमो गर्नका लागि कम्तीमा ४० हजार रुपैयाँ खर्च हुने उनी बताउँछन् । रोग पल्जिए पछि सरकारबाट पाउने मासिक ५ हजार भत्ताबाट ऋण तिर्ने भन्दै ३० हजार ऋण खोजेर काठमार्डौँ आएको र त्यो सकिएको खड्के नेपालीले बताए । 

बेलमतिको उपचार सहयोगका लागि लक्ष्मी सनराइज बैंकको रहेको खाता विवरण निम्नानुसार रहेको छ । 
खातावालाको नामः खड्के नेपाली
खाता नम्बरः ०८७२०००२४४१