काठमाडौं । सवारी चालक अनुमतिपत्र (ड्राइभिङ लाइसेन्स) छाप्ने विद्युतीय चिप्स सकिएपछि असार देखि छपाई नै रोकिएको छ ।

अहिले १२ लाख भन्दा धेरे प्रयोगकर्ताको विवरण भरिएपनि प्रिन्ट हुन सकेको छैन । यस अघि पनि एउटा मात्रै मास प्रिन्टरबाट छपाइ हुँदा लाइसेन्स प्रिन्ट ढिला हुँदै आएको छ ।

अहिले उक्त मेशिन पनि रोकिएको छ । अहिले स्मार्ट लाइसेन्सको सिस्टम चलाइरहेको भारतीय कम्पनी र कार्ड आपूर्ती गर्ने जर्मनी कम्पनीबिच तालमेल नमिल्दा लाइसेन्स छपाई रोकिएको यातायात व्यवस्था विभागले जनाएको छ ।

विभागका अनुसार जर्मनीको म्युहलबाअर कम्पनीले १२ लाख कार्ड आपूर्ति गर्ने गरी ३ महिनाअघि नै सम्झौता गरेको थियो ।

तर जमर्नी कम्पनीले ल्याउने कार्डमा प्रिन्टको जिम्मा लिएको भारतको मद्रास सेक्युरिटी प्रिन्टर्सले नेपालको विवरण भर्न नसक्दा प्रिन्टनै रोकिएको हो । हाल देशभर दैनिक ३ देखि ५ हजारले लाइसेन्स परीक्षा पास तथा नवीकरणका लागि प्रक्रिया पूरा गर्छन् ।

तर, सरकार भने भएको एउटा छपाइ मेसिन पनि बन्द गरेर बसेको छ । विभागले लाइसेन्स छपाइमा ढिलाइ भएपछि सवारी चालकहरूलाई एक वर्षका लागि क्युआर कोड सहितको अस्थायी लाइसेन्स दिने गरेको छ । उसो त विभागले खरिद गरेको कार्ड भन्दा प्रिन्ट गर्न बाँकी कार्डको संख्या धेरै भएको छ ।

विभागले जमर्नी कम्पनीसँग २ लाख कार्ड माग गरेको थियो तर छपाई गर्नु पर्ने विवरण भरिएको संख्यानै १२ लाख पुगेको छ ।