खड्काको लचकतापछि दबाबमा इतरपक्ष

काठमाडौँ । कांग्रेसका निवर्तमान कार्यबाहक सभापति पूर्णबहादुर खड्का संस्थापनले आह्वान गरेको पार्टीको १५औँ महाधिवेशनमा सहभागी हुन लचक बनेपछि इतरपक्ष दबाबमा परेको छ ।

Watch On

सभापति गगनकुमार थापाले खड्कासँगको सहमतिपछि नै कार्यसम्पादन समिति बैठक बोलाएका हुन् । सानेपामा जारी कार्यसम्पादन समिति बैठकले सभापति गगन थापा र निवर्तमान कार्यबाहक सभापति पूर्णबहादुर खड्काबीच भएको सहमति अनुमोदन गर्दै महाधिवेशनमा सहभागी हुन पार्टीका सबै नेता तथा कार्यकर्तालाई आह्वान गर्ने बताइएको छ ।

विशेष महाधिवेशनबाट निर्वाचित केन्द्रीय समितिले आह्वान गरेको महाधिवेशनलाई चुनौती दिँदै इतरपक्षले समानान्तर महाधिवेशनको तालिका सार्वजनिक गरेपछि कांग्रेस औपचारिक रुपमा नै दुई चिरा परेको सन्देश कार्यकर्तामाझ गएको थियो ।

सभापति थापा निकट स्रोतका अनुसार, थापाले नेता शेखर कोइराला र खड्कासँग पछिल्लो पटक गरेको छलफलबाट संस्थापन पक्ष उत्साहित छ । खड्काले आफ्ना केही माग कार्यसम्पादन समितिबाट सम्बोधन गरे महाधिवेशनमा सहभागी हुने ‘बचन’ दिएका छन् ।

पछिल्लो संवादपछि खड्का पक्षका नेताहरु पनि महाधिवेशनमा सहभागी तयारीमा जुटेका छन् । कतिपय नेताले इतरपक्षले पूर्वमहामन्त्री डा. शशांक कोइरालाको संयोजकत्वमा गठित महाधिवेशन तयारी समितिको जिम्मेवारीबाट समेत अलग भएको घोषणा गरेका छन् । इतरपक्षले तोकेका केही जिल्ला प्रतिनिधिले पनि जिम्मेवारी अस्वीकार गरेका छन् ।

खड्कासहितका नेताहरु अहिले कार्यसम्पादन समितिको निर्णयको प्रतीक्षामा छन् । इतरपक्षले चौधौँ महाधिवेशनबाट बनेको केन्द्रीय समितिमा रहेका १११ जनालाई केन्द्रीय समितिमा मनोनीत गर्न सभापति थापालाई आग्रह गरेको थियो । तर, तीमध्ये केहीलाई केन्द्रीय सदस्य मनोनयन गर्ने सभापति थापाको तयारी छ ।

संस्थापन पक्षसँग खड्का र उनी समर्थक नेताहरुको निकटता बढिरहेका बेला निवर्तमान सभापति शेरबहादुर देउवा र नेता शेखर कोइराला भने दबाबमा परेका छन् ।

स्रोतका अनुसार, शेखर कोइरालाले निकटस्थ केही नेताहरुसँग छलफल गरेका छन् । शेखरले नै केही दिनअघि सभापति थापालाई निवर्तमान सभापति देउवासँग भेटवार्ता गर्न सल्लाह दिएका थिए । उनको सल्लाहअनुसार नै थापाले देउवालाई भेट्न प्रयास गरे पनि देउवाले समय नदिँदा थापा र देउवाबीच भेटवार्ता हुन सकेको छैन ।

कार्यसम्पादन समितिले केही नेतालाई केन्द्रीय समितिमा मनोनीत गर्ने, गत पुससम्म नवीकरण भएका क्रियाशील सदस्यतालाई मान्यता दिई डिजिटल अद्यावधिकलाई अनिवार्य नगर्ने, केन्द्रीय अनुशासन समिति र निर्वाचन समितिमा (इतरपक्षका) नेता तथा प्रतिनिधिलाई पनि समावेश गर्दै महाधिवेशनमा सहभागी हुन अपिल जारी गर्ने तयारी गरेको छ ।