इनम सापकोटा प्रकरणमा अनुसन्धानसँग सम्बन्धित सूचना सार्वजनिक भएकोप्रति प्रहरीको ध्यानाकर्षण

काठमाडौं । इनम सापकोटासम्बन्धी अनुसन्धानका विषयमा विभिन्न सञ्चारमाध्यममा प्रकाशित समाचारप्रति जिल्ला प्रहरी परिसर काठमाडौंले ध्यानाकर्षण भएको जनाएको छ।

Watch On

परिसरले बुधबार प्रेस विज्ञप्ति जारी गर्दै अनुसन्धान अधिकारीलाई स्रोतका रूपमा उल्लेख गरी अनुसन्धानसँग सम्बन्धित विषय सार्वजनिक गरिएका समाचार तथा सामग्रीप्रति ध्यानाकर्षण भएको जनाएको हो।

प्रहरीका अनुसार नेपाल सरकार वादी र इनम सापकोटासमेत प्रतिवादी रहेको मुद्दाको अनुसन्धान प्रचलित कानुन, विधि र प्रक्रियाअनुसार गोप्य रूपमा भइरहेको छ। अनुसन्धानसँग सम्बन्धित संवेदनशील विवरण, प्रमाण तथा सूचना कुनै पनि व्यक्ति वा पक्षलाई उपलब्ध नगराइएको पनि परिसरले स्पष्ट पारेको छ।

अनुसन्धानको निष्पक्षता, व्यावसायिकता र गोपनीयता कायम राख्न कार्यालय प्रतिबद्ध रहेको विज्ञप्तिमा उल्लेख छ।

अनुसन्धानको संवेदनशीलता र प्रचलित कानुनी व्यवस्थाको पालना नगरे कानुनबमोजिम हुने चेतावनी दिँदै प्रहरीले मुद्दासँग सम्बन्धित सूचना तथा सामग्री प्रकाशन वा प्रसारण गर्दा त्यसको आधिकारिकता पुष्टि गर्न आग्रह गरेको छ।

जिल्ला प्रहरी परिसर काठमाडौंका प्रवक्ता तथा सूचना अधिकारी प्रहरी उपरीक्षक दानबहादुर थापाले जारी गरेको विज्ञप्तिमा अनुसन्धानसँग सम्बन्धित सामग्रीले जनमानसमा भ्रम सिर्जना गर्न सक्ने भन्दै त्यसप्रति सचेत रहन आग्रह गरिएको छ।