इनम सापकोटा प्रकरणमा अनुसन्धान गर्न प्रहरीले बनायो छुट्टै समिति

काठमाडौं । बिचौलिया इनम सापकोटासँग उच्च पदस्थ व्यक्ति र व्यवसायीहरूको सम्पर्क देखिएको विवरण सार्वजनिक हुन थालेपछि उनीमाथिको अनुसन्धान गर्न छुट्टै समिति गठन गरिएको छ। काठमाडौं उपत्यका प्रहरी कार्यालय रानीपोखरीमा कार्यरत प्रहरी उपरीक्षक (एसपी) नरहरि रेग्मीको नेतृत्वमा समिति गठन गरिएको हो। 

Watch On

सिधाकुरासँगको कुराकानीमा जिल्ला प्रहरी परिसर काठमाडौंका प्रवक्ता तथा एसपी दानबहादुर थापाले समिति बनाएको पुष्टि गरे। यद्यपि उनले सुरक्षाको विषय भन्दै त्यसबारे थप खुलाउन चाहेनन्।

उनका अनुसार सम्पत्ति शुद्धीकरणको अनुसन्धानमा प्रहरीले छुट्टै समिति बनाएर अध्ययन गर्न पाउने कानुनी अधिकार प्रयोग गरेर समिति गठन गरिएको हाे । 

समितिले जिल्ला प्रहरी परिसर काठमाडौंको हिरासतमा रहेका सापकोटामाथि अनुसन्धान सुरु गरेको एक अधिकारीले बताए।

ती अधिकारीका अनुसार एसपी रेग्मी नेतृत्वको टोलीले जिल्ला प्रहरी परिसरको अनुसन्धान टोलीलाई समेत आवश्यक सहजीकरण र मार्गनिर्देशन गरिरहेको छ।

पूर्वप्रधानन्यायाधीश चोलेन्द्रशमशेर जबरासँग सम्पर्क रहेको र अदालतमा बिचौलियामार्फत चलखेल हुने गरेको सूचनाका आधारमा पक्राउ परेका सापकोटामाथि अनुसन्धान अघि बढाइएको थियो। अनुसन्धानका क्रममा विभिन्न उच्च पदस्थ व्यक्तिहरूसँग उनको सम्पर्क रहेको विवरण भेटिएको अनुसन्धानमा संलग्न अधिकारीहरूको भनाइ छ।

सार्वजनिक विवरणअनुसार सापकोटाको सम्पर्कमा प्रधानन्यायाधीश, न्यायाधीशलगायत उच्च पदस्थहरूसँग सम्पर्क रहेको खुलेको छ।

त्रिभुवन अन्तर्राष्ट्रिय विमानस्थलबाट पक्राउ परेका सापकोटामाथि सुरुमा अभद्र व्यवहारसम्बन्धी कसुरमा अनुसन्धान अघि बढाइएको थियो। अहिले भने उनीमाथि सम्पत्ति शुद्धीकरणसम्बन्धी कसुरमा समेत अनुसन्धान भइरहेको समाचारमा उल्लेख छ।