सीमावर्ती रक्सौलको हतियार उद्योगमा प्रहरीको छापा, भारी मात्रामा हातहतियारसहित चार जना पक्राउ

वीरगंज । वीरगंज नजिकैको सिमावर्ती भारतीय शहर रक्सौलको सिरिसिया गाउँमा अवैध रूपमा सञ्चालनमा रहेको हतियार उत्पादन गर्ने उद्योगमा भारतीय प्रहरीले ठूलो अपरेशन गर्दै भारी मात्रामा हातहतियार बनाउने उपकरण र कच्चा सामग्री सहित चारजनालाइ पक्राउ गरेको छ । पोल्ट्री फार्मको आडमा लुकाई राखिएको उक्त गैरकानुनी उद्योगमा १२ घण्टासम्म लगातार छापामारी गर्दै उत्पादनदेखि बेच्नेसम्मका चारजनालाइ पक्राउ गरिएको भारतिय प्रहरीले जनाएको छ । 

मोतिहारी जिल्ला प्रहरी कार्यालयको विशेष सूचनाका आधारमा पलनवा थाना क्षेत्रको सिरिसिया गाउँमा पुगेको प्रहरी टोलीले उक्त हतियार उद्योग फेला पारेको हो । प्रहरीले घटनास्थलबाट विभिन्न खालका पेस्तोल, कार्बाइन, गोली, हतियार बनाउने कच्चा सामग्री, मोल्ड, ड्रिल मेशिन, वेल्डिङ मेशिन, अर्धनिर्मित पेस्तोल बडी, म्यागजिन, स्लाइडिङ पार्ट, खोका, तलवार लगायतका वस्तुहरू बरामद गरेको छ । बरामद हतियार सामग्री एकीकृत रूपमा सञ्चालनमा रहेको अवस्थामा भेटिएको भारतिय प्रहरीले जनाएको छ ।

पक्राउ परेका चार जना व्यक्तिहरू मध्ये हतियार उद्योगका मुख्य सञ्चालक पंकज सिंह, उनका बुबा राजेश्वर सिंह, छपरा निवासी अमिताभ शर्मा र मुंगेरका नौयर आलम रहेका छन् । पक्राउ परेका मध्ये नौयर आलम प्रख्यात हतियार प्रशिक्षक मानिएको र उनले मोल्डिङ तथा डिजाइनिङको जिम्मा लिइरहेको अनुसन्धानबाट खुलेको छ । उनले दर्जनौँ हतियार निर्माण तालिम दिएको प्रारम्भिक जानकारी भारतीय प्रहरीले दिएको छ ।

घटनास्थलबाट भारतिय प्रहरीले १ थान कंट्री मेड कार्बाइन, ३ थान देशी पेस्तोल, ३१ थान ३.५ बोरको कारतुस, ४३ थान ९ एमएमको कारतुस, ९० थान ७.६२ एमएमको कारतुस, २ थान खोका, १ थान देशी सिक्सर, ६ थान अर्धनिर्मित पेस्तोल बडी, १० थान स्लाइडिङ, २० थान म्यागजिन अर्धनिर्मित, ६ थान मोल्ड, ३ थान अर्धनिर्मित बोस, १ थान ड्रिल मेशिन, १ थान वेल्डिङ मेशिन, १ थान तलवार, २ थान ड्रिल मेशिन, १ थान लेथ पुसिन, १ थान श्यामपट्ट, ७ थान अर्धनिर्मित फ्रेमलगायत सामाग्री बरामद गरेको छ । 

यो फ्याक्ट्री सिरिसिया गाउँमा रहेको पोल्ट्री फार्मभित्र लुकाइएको थियो र त्यहाँ दैनिक रूपमा हतियार उत्पादन भइरहेको पक्राउ परेकाहरूबाट खुलेको छ । फार्ममा काम गर्ने मजदुर र फ्याक्ट्री सञ्चालकहरूबीच विभिन्न जिम्मेवारीहरू दिइएको जानकारी खुलेको छ । । प्रहरीको प्रारम्भिक अनुसन्धानमा पंकज सिंहले आफ्नो बुबाको साथमा हतियार बनाउने सम्पूर्ण समान जुटाउने र विभिन्न व्यक्तीहरूलाइ सपलाइ गर्ने गरेको पता लागेको छ । 

यस घटनाले नेपाल–भारत खुला सिमानामा भइरहेको आपराधिक गतिविधिको झनै गम्भीर तस्वीर देखाएको छ । भारतिय प्रहरीका अनुसार उत्पादित हातहितयार सेफ्टि भनेर लगिएपनी लुटपाट, हत्या, हिसाँ लगायत अपराधिक गतिविधिमा प्रयोग भएको जनाएको छ । 

यस्ता फ्याक्ट्रीहरूबाट उत्पादन हुने हतियारहरू भारत सहित विभिन्न व्यक्तिहरूबाट नेपाली भूमिमा समेत पुग्ने गरेको जनाएको छ । पक्राउ परेका व्यक्तिहरूको बयान र कारखानाको स्थानले तस्कर समूहद्वारा नेपाली भू–भागमा पनि हतियार आपूर्ति भइरहेको हुन सक्ने आशंकामा बल पुर्याएको छ । सीमावर्ती क्षेत्रमा यसरी चलाइएका उद्योगहरूले दुवै देशका लागि सुरक्षा चुनौती बढाएको छ । 

सिरिसिया गाउँ भारत–नेपाल सीमाबाट निकै नजिक पर्छ र यहाँ यस्ता अवैध गतिविधि सजिलै लुकाउन सकिन्छ । प्रहरी स्रोतका अनुसार यस फ्याक्ट्रीमा नेपालसहित अन्य राज्यमा आपूर्ति गर्ने उद्देश्यले हतियार बनाउने काम हुँदै आएको थियो । यो नेटवर्कको उद्योग पता लागेको हो यस उद्योगबाट कसले के के किने र कहाँ प्रयोग भएको बारे अनुसन्धान भइरहेको छ । बरामद हतियार र उपकरणहरूलाई परीक्षणका लागि प्रयोगशालामा पठाइएको छ भने पक्राउ परेकाहरूबारे थप अनुसन्धान भइरहेको प्रहरीले जनाएको छ । 

भारतीय प्रहरीले यस अपरेशनलाई ठूलो सफलता मानेको छ र भविष्यमा यस्ता गैरकानुनी गतिविधि नियन्त्रणका लागि थप निगरानी बढाउने जनाएको छ । छापामारीमा अनुमंडल पुलिस पदाधिकारी रक्सौलका धीरैन्द्र कुमार, थानाध्यक्ष पलनवाका सीता केवट, थानाध्यक्ष भेलाहीका शाहरुख, थानाध्यक्ष रामगढवाका अमरजीत कुमार, थानाध्यक्ष परसाका सुनील कुमार लगायतको प्रहरी टोलि रहेका थिए ।