रवि लामिछानेमाथि लगाइएको मुद्दामा दम छैन, सरकारले टालटुल गरेर मुद्दा बनाएको छः सांसद सोबिता गौतम

राष्ट्रिय स्वतन्त्र पार्टी (रास्वपा) सांसद सोबिता गौतमले पार्टी सभापति रवि लामिछानेमाथि राजनीतिक प्रतिशोधका आधारमा मुद्दा हालिएको बताएकी छिन् । 

कास्कीस्थित रुपा गाउँपालिकामा पार्टी कार्यालय उद्घाटन कार्यक्रमलाई सम्बोधन गर्दै गौतमले  सभापति लामिछानेविरुद्ध लगाइएको मुद्दामा कुनै दम नभएको तर्क गरेकी हुन् । 

उनले भनिन्, ‘हामी नेतृत्वले गरेको गल्ती ढाकछोप गर्ने पुस्ता होइनौं, तर म एउटा सचेत नागरिक भएको हिसाबले, कानुनको विद्यार्थी भएको हिसाबले के चाहिँ भन्न चाहन्छु भने त्यो मुद्दामा दम छैन, त्यहाँ टालटुल गरेर मुद्दा बनाइएको छ,’ । 

नेपाली जनताले आशा र विश्वास गरेका सभापति लामिछानेलाई न्यायालयले भने न्याय दिनेमा आफूले विश्वास राखेको बताइन् । 
साथै सांसद गौतमले सरकार भ्रष्टाचारका काण्ड दबाउन उद्दत रहेको बताएकी छन् । रास्वपाले सरकारमा गएर भ्रष्टाचारका फाइल खोल्दै कारवाही अगाडि बढाएपछि हतारमा कांग्रेस एमाले सरकार बनेको र भ्रष्टाचारका काण्डहरुको अनुसन्धान रोकिएको उनको दाबी छ । 

गौतमले हिजोका दिन गुपचुप पारिएका भ्रष्टाचारका फाइल रास्वपाले सदन र सरकारमा रहेर उजागर गरेपछि ढाकछोपका लागि कांग्रेस एमालेको सरकार बनेको बताइन् ।  

उनले भनिन्, 'रास्वपा आएपछि के भयो भन्दा भ्रष्टाचार गरेको थाहा भयो, कहाँ भयो भन्ने थाहा भयो । पोखरामा १० अर्ब बढी भ्रष्टाचार भएको थाहा भयो । वाइडबडीमा भ्रष्टाचार भयो, वर्षौदेखिको गिरिबन्धुको भ्रष्टाचार पनि बाहिर  आयो । अहिले  संसदीय छानबिन समितिको नजिर बसालिहालियो , अब हाम्रो पनि पालो आउँछ भनेर त्यसलाई ढाकछोप गर्ने काम भएको छ । भुटानी शरणार्थी काण्डको फाइल खोलिएको थियो । प्रक्रिया धेरै अगाडि बढिसकेको थियो । अब हामीलाई छोड्दैनन् भनेर त्यसलाई पनि दबाउने काम गरिएको छ । यो जनताले देखेका छन्, मनमा राखेका छन्' ।