महानगर यातायात सञ्चालकको गुनासोः ‘हाम्रो नाम र रङ कपी गरेर चलेका नक्कली महानगरका गाडीले हैरान पारे’

काठमाडौँ । महानगर यातायात प्रा.लि.ले आफ्नो नाम, रङ र डिजाइन नक्कल गरी सोही आकार र प्रकारका बसहरू यात्रुलाई झुक्याउने गरी सोही रुटमा चलिरहेका कारण गम्भीर आपत्ति जनाएको छ। बुधबार काठमाडौँमा आयोजित पत्रकार सम्मेलनमा, कम्पनीका प्रतिनिधिहरूले यस्तो अनियमितताको विरोध गरेका हुन् । 

Watch On

महानगर यातायात प्रा.लि.का अनुसार, नक्कली बसहरूले आफ्नो नाम र रङलाई नक्कल गर्दै यात्रुहरूलाई यात्रुहरूलाई भ्रमित पारिरहेका छन् । ति नक्कली बसहरुले गराएका दुर्घटनाका कारण महानगर यातायात बद्नाम हुन परेको महानगर यातायात प्रा.लि.का अध्यक्ष सन्तोष खतिवडाले बताए । 

‘बिडम्बना यतिसम्म छ कि यात्रुहरुले बसमा आफ्नो महत्वपूर्ण कागजात भएको झोला छुटाउँछन्, छुटेको झोला लिन महानगर यातायातको कार्यालयमा आउँदा उनीहरुले यात्रा गरेको बस नक्कली महानगर भएको थाहा हुन्छ र सामान फेला पर्दैन ।’, खतिवडाले भने, ‘नक्कली महानगरले यातायतको गाडीले पैदल यात्रीलाई ठक्कर दिएर भागेपछि पीडितहरुले प्रहरीमा खबर गर्छन्, र महानगर यातायातको कार्यालयसम्म पनि आइपुग्छन् । कतिपय अवस्थामा अनुसन्धानपछि यथार्थ पत्ता लाग्छ तर धेरै जसो केसमा त्यसरी दुर्घटना गराउने गाडी चिन्न नसक्दा न्याय पाउन सकिरहेका छैनन् । यस्तो अवस्थामा हामीले अनावश्यक झन्झट व्यहोरीरहेका छौँ ।’ उनले महानगरको नाममा २०० बढी गाडी काठमाडौँमा चलिरहेको दावी गरे । 

यस विषयमा बारम्बार प्रहरी प्रशासन, यातायात कार्यालय र यातायात विभाग लगायतका निकायसँग निवेदन दिए पनि यकुनै कारबाही पहल नभएपछि पत्रकार सम्मेलन गरी जानकारी गराउनुपरेको अध्यक्ष खतिवडाले बताए । यस विषयमा कानुनी उपचार पनि खोजिने खतिवडाले जानकारी दिए ।

महानगर यातायात प्रा।लि।ले आगामी दिनमा यस्तो अनियमितता रोक्न र यात्रुहरूको सुरक्षा सुनिश्चित गर्न सम्बन्धित निकायसँग समन्वय गर्दै सशक्त कदम चाल्नका लागि माग गरेको छ।

महानगर यातायात प्रा.लि.ले ९ वर्षअघि सेवा सुरु गरेको थियो । सुरुवाती समयमा एकैपटक ३९ वटा सिटि बससहित सेवा सुरु गरेको महानगर यातायातले आगामी दिनमा यात्रुहरुको सहजताका लागि दर्जनबढी इभि बस सञ्चालनमा ल्याउन लागेको छ । साथै सेवा सुविधालाई पनि थप परस्कृत गर्दै लैजाने बताइएको छ । त्यसका साथै निकट भविष्यमै पब्लिक लिमिटेड कम्पनीको रुपमा आम जनतामाझ आइपिओ जारी गर्ने समेत तयारी गरेको छ ।