पर्सा । पर्सा जिल्लाको पोखरिया नगरपालिकामा अख्तियार दुरुपयोग अनुसन्धान आयोगको टोलीले छापा मारेको छ । विभिन्न योजना, खरिद प्रक्रिया तथा कर्मचारी नियुक्तिमा अनियमितता र अवैध क्रियाकलापको आशंकामा अख्तियारको केन्द्रीय कार्यालयको टोलीले छापा मारेको हो । 

आयोगका अनुसार पोखरिया नगरपालिकाले अनाधिकृत रूपमा कर्मचारी भर्ना, ठेक्का प्रक्रिया, मालसामान खरिद, बजेट विनियोजन तथा योजनाको कार्यान्वयनमा कानुनविपरीत कार्य गरेको भन्ने उजुरीका आधारमा प्रारम्भिक अनुसन्धान गर्दा अनियमितता देखिएका कारण छापा मारिएको हो । 

अनुसन्धानको सिलसिलामा आयोगको टोलीले नगरपालिकाका लेखा, योजना र प्रशासन शाखा एकैसाथ छापा मारेको हो । श्रोतका अनुसार अख्तियारको टोलीले उक्त कार्यालयबाट विभिन्न कागजातका साथै विद्युतिय उपकरणहरुसमेत बरामद गरेको छ । छानबिनका क्रममा आयोगले करारमा नियुक्त कर्मचारीहरूको प्रक्रिया, योजनाको मूल्यांकन, कामको प्रगति विवरण, भुक्तानी सम्बन्धी अभिलेख तथा बजेट विनियोजनसँग सम्बन्धित दस्तावेजहरू चेकजाँच गरिरहेको जनाइएको छ । 

साथै, अख्तियारले यसअघि पोखरियाकै निम्ति प्रमुख प्रशासकीय अधिकृत अजय कुमार श्रीवास्तवलाई बहुदरमाई नगरपालिकासँग जोडिएको घुस प्रकरणमा पक्राउ गरिसकेको छ ।

स्थानीयले नगरपालिकामा लामो समयदेखि भ्रष्टाचार भएको गुनासो गर्दै आएका थिए । सोही क्रममा उनीहरुले आयोगमा उजुरी गरेपछि अख्तियारले छापा मारेको हो ।