ईरानमा हमला पछि राष्ट्रको नाममा तीन मिनेटको सम्बोधनमा राष्ट्रपति ट्रम्पले के-के भने ?

ईरानको न्युक्लियर साइटमा हमला पछि अमेरिकी राष्ट्रपति डोनाल्ड ट्रम्पले ह्वाइट हाउसबाट देशवासीका नाममा सम्बोधन गरे । करिब तीन मिनेट लामो सङ्क्षिप्त सम्बोधनमा उनले ईरानमाथिको आक्रमण सफल भएको भन्दै अमेरिकी सैन्य सफलताको तारिफ गरे ।

Watch On

साथै उनले अमेरिकी आक्रमणबाट ईरानको आणविक साइटहरु ध्वस्त पारिएको भन्दै अझै इरानले शान्तिको बाटो नसमाते नतिजा झनै खराब हुने धम्कीसमेतको दिएका छन् । ‘अमेरिकाको आक्रमण अद्भूत सैन्य सफलता हो,’ उनले भने,‘इरानका आणविक पूर्वाधारहरू पूर्ण रूपमा ध्वस्त पारिएको छ ।’

उनले इरानले अब शान्तिको मार्ग रोज्नैपर्छ । यदि गरेन भने भविष्यमा हुने आक्रमणहरू अझ ठूलो र सजिलो हुने चेतावनी पनि दिए । उनले थपे, ‘हामीसँग अझ धेरै लक्ष्यहरू बाँकी छन् । यदि चाँडै शान्ति कायम भएन भने ती अन्य लक्ष्यहरूलाई पनि तीव्र, सटीक र दक्षताका साथ आक्रमण गरिनेछ ।’

अझै पनि ईरान नसुध्रिए अवस्था अझै भयावह हुने पनि चेतावनी दिए । ‘यो अवस्था अब चल्न सक्दैन,’ ट्रम्पले भने, ‘अब या त शान्ति हुनेछ, या इरानका लागि यस्तो विपत्ती आउनेछ जुन पछिल्ला आठ दिनमा देखिएभन्दा पनि निकै भयावह हुनेछ ।’ 

राष्ट्रपति ट्रम्पले इजरायलका प्रधानमन्त्री बेन्जामिन नेतान्याहुलाई धन्यवाद र बधाई पनि दिए । उनले भने,‘अमेरिका र इजरायल एउटै टोलीका रूपमा काम गरे, र इजरायलमाथिको यो भयावह खतरा हटाउने दिशामा धेरै टाढासम्म अगाडि बढेका छन् ।’ 

ट्रम्पले सम्बोधनको अन्त्यमा अमेरिकी सेनाका संयुक्त प्रमुख जनरल ड्यान केनले आइतबार बिहान ८ बजे ९स्थानीय समयअनुसार० पत्रकार सम्मेलन गर्ने पनि जानकारी दिए। यद्यपि यस अघि ट्रम्पले विदेशमा अमेरिकी सैन्य हस्तक्षेप नगर्ने प्रतिवद्धता जनाउँदै आएका थिए ।  उनले यो आक्रमणलाई आफूले पहिलो कार्यकालमा गराएको इरानी जनरल कासिम सुलेमानीको हत्या सरह मानिएको बताएका छन् ।