कटारी नगरपालिकाले ल्यायो  ८७ करोड बढीको बजेट

उदयपुर । उदयपुर जिल्लाको कटारी नगरपालिकाले आगामी आर्थिक वर्ष २०८२/०८३ का लागि ८७ करोड ६५  लाख ३ हजार  ४ सय ३९ रुपैयाँको बजेट सार्वजनिक गरेको छ ।

नगरपालिकाको १५ औं नगरसभामा उप प्रमुख गीता खड्काले उक्त बजेट प्रस्तुत गर्दै नीति तथा कार्यक्रमसँगै जनताको अपेक्षा समेट्ने खालको विकासमुखी बजेट रहेको बताए । 

बजेट अनुसार राजस्व बाँडफाँड संघ तर्फ १८ करोड २२ लाख ६८ हजार ४ सय ३९ रुपैयाँ र प्रदेश तर्फ १ करोड ४९ लाख २४ हजार ,वित्तीय समानीकरण अनुदान संघ तर्फ १२ करोड ४३ लाख ,प्रदेश तर्फ १ करोड १ लाख ७६ हजार ,सशर्त अनुदान संघ तर्फ ४३ करोड ८२ लाख प्रदेश तर्फ ४९ लाख ६६ हजार समपूरक अनुदान संघ तर्फ ५५ लाख ,प्रदेश तर्फ १ करोड १५ लाख बजेट अनुमान गरिएको छ। 

नगरपालिकाले कृषिमा आधुनिकीकरण, व्यावसायीकरण र स्वरोजगारमुखी कार्यक्रम ल्याएको छ । कृषकलाई सहज बनाउन कृषि तथा पशुपन्छी क्षेत्रमा  कृषकको नजिक गई सेवा प्रवाह गर्नको लागि प्रत्येक वडामा प्राविधिक खटाउने व्यवस्था मिलाउने, रैथाने बालीको संरक्षण गरिने र उत्पादनको सञ्जाल विस्तार गरिने बताइएको छ ।

त्यसैगरी नगर भित्रका समुदायिक विद्यालयका कक्षा ११ र १२ मा निःशुल्क विज्ञान संकाय अध्ययनका लागि अनुदान दिने कार्य लाई निरन्तरता दिने, अङ्ग्रेजी माध्यम बाट पढाइ हुने विद्यालय लाई दिँदै आएको अनुदानलाई निरन्तरता दिने, जेष्ठ नागरिक लाई स्वास्थ सेवा घरदैलोमा सेवा प्रदान गर्ने , नगरपालिकाको माथिल्लो भेगका नागरिक लाई स्वास्थ सेवा सहज बनाउन गहुबारी बर्थिङ सेन्टर लाई नगर अस्पताल रूपमा विस्तार तथा स्तर उन्नती गर्ने, कृषि एम्बुलेन्स जस्ता कार्यक्रम यो पटक प्राथमिकतामा रहेको नगर प्रमुख राजेशचन्द्र  श्रेष्ठले बताए । लैंगिक सशक्तीकरण तथा सामाजिक समावेशीकरण सम्बन्धी नीति तथा दलित सम्बन्धी ऐनलाई आगामी आर्थिक वर्षमा पारित गरी कार्यान्वन गर्ने नगरपालिकाको नीति रहेको प्रमुख प्रशासकिय अधिकृत राजन थापाले बताए।

नगरपालिकाले पूर्वाधार विकास, कृषि सुधार, शिक्षा र स्वास्थ्य सेवा विस्तारमा विशेष जोड दिइएको जनाएको  छ ।