जसपाका मधेश अध्यक्ष यादवको सर्लाहीका प्रहरी प्रमुखलाई धम्की,'...ए एसपी सुन्, कोहो तिमीहरु' (भिडियो)

काठमाडाैँ । अशोक राई नेतृत्वको जनता समावादी पार्टी(जसपा)का मधेश प्रदेश अध्यक्ष अशोक यादवले सर्लाहीका प्रहरी प्रमुख उपरीक्षक(एसपी) योगेन्द्रकुमार खड्कालाई धम्की दिएको अडियो सार्वजनिक भएको छ । 

Watch On

सार्वजनिक भएको अडियोमा पूर्वाधार कार्यालयका कर्मचारीले रातिमा अवैध काम गर्ने र त्यसमा प्रहरीले संरक्षण गरेको भन्दै अध्यक्ष यादवले एसपी खड्कालाई फोन गरेको सुनिन्छ । 
फोनमा यादवले एसपीलाई  ‘को हो तिमीहरु’ भन्दै अपशब्द बोलेको समेत सार्वजनिक अडियोमा सुनिन्छ । 

सुरुबाटै चर्काचर्की हुन लागेको संवादमा नेता यादवले एसपी खड्कालाई ‘तिमीहरू मधेशमा लुट्न आएको’ भन्दै थर्काउँछन् । अडियोमा  प्रहरीले रातिराति मान्छे बोलाएर पैसाको कमिसन लिने गरेको, सुरक्षा दिनुपर्ने प्रहरी नै लुटतन्त्र मच्चाउन सक्रिय रहेको र गलत काम गर्ने सरकारी कर्मचारीलाई संरक्षण दिएको  भन्दै यादवले तपाईं लुटेराहरु’ भन्दै गाली गरेको सुनिन्छ । त्यसपछि एसपी खड्काले पनि ‘कसलाई गाली गरेको’ भन्दै प्रश्न गरेको सुनिन्छ । 

 एसपी खड्काले ‘अलि कुरा बुझेर बोल्नुहोस्’ भन्दै आफूमाथि लागेका आरोपहरूको खण्डन गर्न खोज्छन् । तर, नेता यादवले भने आफ्नो अडान दोहोर्याउँदै ‘तपाईंहरू मधेशमा कमिसन खान आएको, तपाईंहरू लुट्न आएको’ भन्दै लगातार आरोप लगाएका छन् । 

त्यसपछि ‘ए, एसपी ए एसपी सुन्’ भन्दै अध्यक्ष यादवले भनेको अडियोमा सुनिन्छ । 

अडियो सार्वजनिक भएपछि यसको सत्यतथ्य छानबिन गर्न मधेश प्रदेश प्रहरी कार्यालयलाई निर्देशन दिइएको नेपाल प्रहरीका केन्द्रीय प्रवक्ता तथा डीआईजी विनोद घिमिरेले जानकारी दिए ।