बहुविवाहलाई कानुनी मान्यता दिने कानुन ल्याउन लागिएको भन्दै बिनु यादवले सुरु गरिन् अनशन

काठमाडौँ । सरकारले बहुविवाहलाई कानुनी मान्यता दिन सक्ने मस्यौदा ल्याउने तयारी गरिरहेको खबर बाहिरिएसँगै बिनु यादवले त्यसको विरोधमा माइतीघर मण्डलामा आमरण अनशन सुरु गरेकी छिन्। 

Watch On

प्रेमीबाटै बलात्कृत भएको बताउँदै ७ वर्षदेखि न्याय माग्दै आएकी उनले बहुविवाहलाई वैध बनाउने तयारीप्रति रोष प्रकट गर्दै उनी पुनः सडकमा उत्रिएकी हुन्। उनको लडाईँ २०७५ बैशाखबाट सुरु भएको थियो । उक्त समयमा उनी प्रेमीबाट बलात्कार भएको जाहेरी लिएर कालिमाटीस्थित प्रहरी कार्यालय पुगेकी थिइन् । 

त्यसपछि २०७६ मंसिरमा उनका प्रेमी रामेछापका प्रदीप कठायतसँग विवाह भएको थियो । विवाह भएर घर जाँदा उनले चरम घरेलु हिंसा भोग्नुपरेको उनको भनाई छ । उनका अनुसार उनलाई जबरजस्ती गर्भपतन समेत गराइएको थियो । उनका श्रीमान्ले बिनुविरुद्ध २०७७ सालमा सम्बन्धविच्छेद मुद्दा हालेका थिए । 

२०७९ बैशाखमा जिल्ला अदालत रामेछापले उनीहरुको सम्बन्ध विच्छेद हुने फैसला गरेको थियो । सो समयमा बिनुले अदालतमै विष सेवन गरेकी थिइन् । त्यसपछि उनी निरन्तर आफ्नो न्यायको लागि लड्दै आएकी छिन् । सो क्रममा उनले धेरै पटक सडक संघर्ष गरेकी छिन् । धेरै पटक उनलाई प्रहरीले पक्राउ गरेको छ । र अहिले बिनुले फेरि सडक संघर्ष सुरु गरेकी छिन् । 

उनलाई आजै राष्ट्रिय स्वतन्त्र पार्टीकी सांसद डा. तोसिमा कार्कीले भेट गरेकी छिन् ।