सिंगापुरमा नेपाली कम्पनी प्रिज्मा एड्भर्टाइजिङलाई 'ब्रान्डलरेट बेस्ट ब्रान्ड्स अवार्ड २०२५'

काठमाडौँ  । नेपाली रचनात्मक एजेन्सी प्रिज्मा एड्भर्टाइजिङले सिंगापुरमा आयोजित एक भव्य अन्तर्राष्ट्रिय कार्यक्रममा ‘ब्रान्डलरेट बेस्ट ब्रान्ड्स अवार्ड २०२५’ जितेको छ। ब्रान्ड इन्फ्लुएन्सर, क्रिएटिभ र ब्रान्डिङ सोलुसन्स श्रेणीमा सम्मानित प्रिज्मा पहिलो नेपाली कम्पनी हो जसले यो प्रतिष्ठित अवार्ड प्राप्त गरेको हो।

यो सम्मान ३१ जुलाई मा सिंगापुरको शांग्री-ला होटलमा आयोजित समारोहमा प्रदान गरिएको थियो। संस्थापक तथा प्रमुख कार्यकारी अधिकृत रञ्जित आचार्य र महाप्रबन्धक शरद शाहीले नेपालको तर्फबाट यो अवार्ड ग्रहण गरेका थिए।

विश्व ब्रान्ड्स फाउन्डेसनद्वारा आयोजित ब्रान्डलरेट अवार्ड्सले कोका–कोला, नेस्ले, युनिलिभर, टोयोटा, आइबीएम, सामसङ इलेक्ट्रोनिक्सजस्ता विश्व प्रसिद्ध ब्रान्डहरूसँगै ओगिल्वी मलेसिया, लियो बर्नेट भियतनामजस्ता एजेन्सीहरू र क्रिस्टियानो रोनाल्डो, नास डेली, निकोल एन डेभिड जस्ता प्रभावशाली व्यक्तित्वलाई पनि अघिल्ला वर्षमा सम्मानित गरिसकेको छ।

यस वर्ष, आफ्नो २०औं वार्षिकोत्सवको अवसरमा प्रदान गरिएको ‘लिमिटेड एडिसन’ संस्करणको अवार्ड अन्तर्गत, प्रिज्मा एड्भर्टाइजिङले रणनीतिक ब्रान्डिङ र सांस्कृतिक रूपमा प्रभावशाली कथावस्तु निर्माणको क्षेत्रमा देखाएको अग्रणी भूमिकाको कदरस्वरूप विजेता घोषित भएको हो।

संस्थापक रञ्जित आचार्यले भने, “यो अवार्ड हाम्रो टिमको निरन्तर श्रम, सिर्जनात्मकता र नेपाली ब्रान्डलाई विश्वसामु चिनाउने प्रयासको प्रमाण हो। हामीले प्रमाणित गरेका छौं कि प्रामाणिकता र साहसले सीमाहरू तोड्न सक्छ।”

त्यसैगरी, प्रबन्धक शरद शाहीले भने, “३५ वर्षदेखिको हाम्रो प्रयासले नेपाली सिर्जनात्मक उद्योगलाई अन्तर्राष्ट्रिय स्तरमा पुर्‍याएको छ। यो सम्मान नेपालका लागि गर्वको क्षण हो।”

सन् १९९१ मा स्थापित, काठमाडौंस्थित प्रिज्मा एड्भर्टाइजिङ एक ३६० डिग्री सेवा दिने क्रिएटिभ एजेन्सी हो। यसले ब्रान्डिङ, डिजाईन, डिजिटल मार्केटिङ र जनसम्पर्कमा विशेषज्ञता हासिल गरेको छ।

यसको पोर्टफोलियोमा कोका–कोला, नेस्ले, बजाज मोटरसाइकल, वेस्टर्न युनियन, एनसेल, केएल दुगड समूह लगायतका विशिष्ट ब्रान्डहरू छन्। यसले एनसेलको ‘मेरो मोबाइल’ रूपान्तरण, राष्ट्र बैंक र अन्नपूर्ण फाइनान्स जस्ता प्रतिष्ठित परियोजनाहरूको नेतृत्व पनि गरेको छ।

प्रिज्मा पूर्वीय अन्तर्दृष्टिलाई विश्वव्यापी रणनीतिसँग संयोजन गरेर प्रेरणादायी, आकर्षक र परिणाममुखी ब्रान्ड कथाहरू निर्माण गर्नेमा अग्रणी मानिन्छ।

यो अवार्डले नेपालको रचनात्मक उद्योगलाई विश्व मञ्चमा चिनाउने थप ढोका खोलिदिएको छ।