जब हेर्दा हेर्दै आफैँले चलाएको गाडी एक्कासी आएको बाढीले बगायो

काठमाडौँ । गुल्मीका घनश्याम गौतमले बुधबार साँझ फेसबुकमा अनपेक्षित दुर्घटना भन्दै  एउटा स्टाटससहित बाढीमा गाडी बगिरहेको भिडियो पोस्ट गरेका छन् । 

Watch On

उनका अनुसार शान्तिपुरबाट फर्किने क्रममा सत्यवति गाउँपालिका ६ मा पर्ने डहरे खोलामा एक्कासी आएका बाढीले उनले आफैँले चलाएको गाडी बगायो । उनका अनुसार सानो खोलामा आफ्नो गाडी फसेपछि निकाल्ने प्रयास गर्दागर्दै ठुलो बाढी आएर गाडी बगाएको थियो । तर केहिबेर बगाएपछि भने बाढीले गाडीलाई किनारा लगाएको थियो । गौतमका अनुसार उनी र गाडीमा सवार सबैजना सुरक्षित रहेका छन् । उनले लेखेका छन् :

'२०८२ साउन २० गते !
अनपेक्षित दुर्घटना । शान्तिपुरबाट फर्किने क्रममा सत्यवति गाउॅपालिका-६ डहरे खोलामा आफैले चलाएको गाडी फस्यो । हेर्दाहेर्दै र फसेको गाडी निकाल्ने प्रयास गर्दागर्दै अचानक बढेको खोलाले आफ्नै गाडी बगायो । हामी सकुशल रह्यौं ।

जुन बाटो मैले झन्डै ३० बर्षदेखि निरन्तर यात्रा गरेको बाटो हो । डहरे खोला सयौंपटक ओहोरदोहोर गरेको खोला । चार बर्षदेखि गाडीपनि वारपार गराएकै खोला । तर, हिजोको अबस्था अलिक फरक भयो र थियो । खोला सानो थियो । गाडी सहजै पार हुन्छ भन्ने आशाले चलाएको गाडी सोंचे जस्तै पार हुन सकेन । खोलाको पल्लो किनारको अन्तिम अबस्थामा पुगेपछि गाडी फसियो । निकाल्ने प्रयास गर्दागर्दै सानो भएको खोला एक्कासी बढेर लेदोसहित आयो । त्यसपछिका सबै प्रयास असफल भए । अन्ततः गाडी बगेर बडिघाट खोलामै पुग्यो र संयोग ठुलो बाढीबाट जोगिएर फेरी किनारमै फर्कियो र निकाल्न सकियो ।

हामी जोगियौं । गाडीमा पनि सामान्य क्षति भएको छ । तर, प्रसंग र बिषय हामी परेको दुर्घटनाको मात्र होईन । बर्षौंदेखि डहरे खोलाको नाममा राजनीति गर्ने, योजना पारेको र बजेट पारेको भन्दै प्रचारप्रसारमा प्रतिस्पर्धा गर्ने, काम गरेको निर्माण व्यवसायीले रकम नपाएको भन्दै बनेको पुलमा यातायात संचालन गर्न रोक्ने अनि सर्वसाधरण खोलामा बगिरहने र ज्यान जोखिममा पर्ने अबस्थाको कहिले अन्त्य होला ??
आदरणीय नेता ज्यूहरू, 

तपाईहरूले गुल्मीका नाममा गरेको बिकासको नमुना डहरे खोलामै उदांगो भईरहेको छैन र ? त्यसमा बजेट पारेको भन्दै नेताको गुणगानमै प्रचारप्रसार गर्ने कार्यकर्ताहरूको मुकुण्डो कसरी उत्रिएको छ ! त्यसैले सत्यको पछि लागौं, राजनीतिका नाममा अन्धो कार्यकर्ता नबनौं । खबरदारी गर्ने पनि गरौं ।

अन्त्यमा :
हामीलाई परेको अप्ठ्यारोमा जोखिम मोलेर साथ सहयोग गर्ने सबै प्रति हार्दिक आभार । म ठिक छु । हाम्रो चिन्ता र चासो गरिरहनु हुने सम्पूर्ण महानुभावहरूप्रति कृतज्ञ छु । तपाईहरूले प्रत्यक्ष, फोन, सामाजिक संजाल मार्फत सकारात्मक उर्जा दिने, सल्लाह सुझाव र हौसला प्रदान गर्नेहरू प्रति पनि आभारी छु । विपदको अवस्थामा कतिपयको फोन रेस्पोन्स गर्न नसकेपनि, म्यासेजको जवाफ नदिएपनि तपाईहरूको सद्भाव बुझेको छु ।
भगवान, कुलपितृ, मान्यजन र अभिभावकको आशिर्वाद सदैव रहिरहोस् ।'