काठमाडौँ : मंसिर ७ गते काठमाडौँको माइतीघरमा नेकपा एमालेका नेता महेश बस्नेत र मेडिकल व्यवसायी दुर्गा प्रसाईँले छुट्टाछुट्टै कार्यक्रम गर्ने घोषणा यस अघिनै गरिसकेका छन् । 

बस्नेतले एमालेको भातृ संगठन राष्ट्रिय युवा संघ नेपालको ब्यानरमा कार्यक्रम गर्दै छन् भने प्रसाईँले वृहत नागरिक मुक्ति आन्दोलनको ब्यानरमा कार्यक्रम गर्दै छन् । 

यि दुवै समूहले सार्वजनिक गरेका कार्यक्रमको समय तालिका मात्रै होइन कतिपय एजेण्डाहरू पनि मिल्छन् । महङ्गी, कालोबजारी, भ्रष्टाचार लगायतका विषय यी दुवै समूहका साझा एजेण्डा भएपनि दुर्गा प्रसाईँको समूहले भने व्यवस्था नै परिवर्तन गर्ने हुङ्कार गरिरहेका छन् । प्रसाईँले नै गणतन्त्रको काम नभएको भन्दै हिन्दु राज्य सहित राजतन्त्र फर्काउने घोषणा गर्दै आएका छन् । 

यता महेश बस्नेत भने दुर्गा प्रसाईँ अराजकतावादी भएको भन्दै उनकै काउण्टरमा लागेका छन् । 

कुनै समय दुर्गा प्रसाईँ समेत एमालेमा भएका बेला साथी बनेका प्रसाईँ र महेश बस्नेत अहिले एक अर्का विरुद्ध खनिएका छन् । अहिले दुर्गा प्रसाईँले गर्ने कार्यक्रम बिथोल्न बस्नेतकै नेतृत्वमा युवा संघ तथा एमालेको कार्यकर्ता खटिन्छन् भने बस्नेतले आयोजना गर्ने कार्यक्रममा प्रसाईँका समूहका युवाहरू खटिन्छन् । 

केही समय अघि काठमाडौँको जमलस्थित एक होटलमा कार्यक्रम सकेर निस्किँदै गरेका प्रसाईँलाई युवा संघका कार्यकर्ताले मोसो छ्यापे । त्यसको काउण्टरमा झापामा महेश बस्नेत पुगेको कार्यक्रममा आएका गाडीमा प्रसाईँका कार्यकर्ताले आक्रमण गरे । 

आफू माथि मोसो छ्यापे पछिनै प्रसाईँले एमाले र महेश बस्नेतसँग आफ्नो लडाइँ सुरु भएको भनेका थिए । त्यसपछि प्रसाईँले एमालेका अध्यक्ष केपी शर्मा ओलीको विदेशका टेलिकममा लगानी रहेको भन्दै अभिव्यक्ति दिएपछि महेश बस्नेत समूहले नै प्रसाईँका विरुद्ध साइबर ब्युरोमा उजुरी हाले । प्रसाईँ साइबर ब्युरो धाए । 

त्यसको केही समय पछि महेश बस्नेतको एक महिलासँग बेड सीन सहितको टिकटक भिडियो भाइरल भयो । एक युट्युब च्यानलबाट भाइरल गराइएको उक्त भिडियो फेक भएको दाबी सहित महिलाले प्रहरीमा उजुरी हालेपछि अहिले मनोज मानव नाम गरेका युट्युबर प्रहरी हिरासतमा छन् । 

उक्त भिडियो दुर्गा प्रसाईँले भाइरल गराएको भन्ने बस्नेतको बुझाई छ । सोही कारणले बस्नेतले पनि आफूसँग पनि प्रसाईँका त्यस्ता सामाग्री भएको सार्वजनिक कार्यक्रमहरूमै भन्दै हिँडेका छन् । 

दुर्गा प्रसाईँ पनि के कम, एक कार्यक्रममा उनले आफूसँग महेश बस्नेतका धेरै अश्लिल भिडियो भएको भन्दै बोलेका छन् । यसरी अहिले एकले अर्कालाई खुइल्याउने रणनीतिमा प्रसाईँ  र बस्नेत लागेका छन् । यसको परिणाम स्वरुप दुई समुहले नै एकैदिन एकैठाँउमा कार्यक्रम गर्ने घोषणा गरेका छन् । 

जनताका नाममा प्रसाईँ र बस्नेतको व्यक्तिगत स्वार्थको लडाइँ 

मंसिर ७ मा बस्नेतले सरकारको कुशासन र भ्रष्टाचार विरुद्ध भने पनि उनको कार्यक्रमको मुख्य उद्देश्य दुर्गा प्रसाईँको कार्यक्रम बिथोल्ने मात्रै देखिन्छन् । त्यस्तै प्रसाईँले पनि मुक्तिको आन्दोलन भने पनि आफ्नो पक्षमा नागरिक भएको देखाएर बैंक तथा वित्तीय संस्था तर्साउन मात्रै खोजेको देखिन्छ । यहाँ दुवैको व्यक्तिगत स्वार्थ देखिन्छ । 

दुर्गा प्रसाईँले बैंक तथा वित्तीय संस्थाबाट पीडित बनेका जनतालाई मुक्ति दिलाउन भन्दै आन्दोलनको प्रचार गरेपनि उनको आन्दोलनले कसैको पनि ऋण मिनाहा हुने देखिँदैन । किनकी उनले कुनै नीतिगत प्रश्न उठाएका छैनन् । उनले बैंक तथा वित्तीय संस्थाको ऋण नतिर्नु र आन्दोलनमा आउनु भन्दै ठाडो आदेश दिएका छन् । यसो भन्नुका पछि उनी आफैँ विभिन्न बैंकबाट ६ अर्ब ऋण लिनु र गत बैशाखदेखि किस्ता नतिर्नु हो। 

दुर्गा प्रसाईँ, विभिन्न बैकबाट लिएको ६ अर्ब भन्दा बढी ऋणको दबाबमा छन् । मेडिकल कलेज बनाएर विद्यार्थीबाट आउने शुल्कले तिर्ने योजनामा ऋण लिएका प्रसाईँ सरकारले कलेज चलाउनै नदिएपछि ऋण तिर्ने वातावरण नै नभएको भन्दै हिँडिरहेका छन् । देशको सबै बैङ्किङ प्रणाली केही व्यक्तिको हातमा पुगेको र उनीहरूका कारण सर्वसाधारणले आर्थिक मार खेपिरहेको भन्ने उनको दाबी केही हदसम्म सत्य भएपनि उनको अराजकताले सत्यतालाई ओझेलमा पार्ने गरेको छ । अहिले प्रसाईँले आन्दोलनका लागि गणतन्त्र फाल्नका लागि भन्दै आर्थिक सहयोग समेत उठाएका छन् । 

दुर्गा प्रसाईँको आन्दोलनले व्यवस्थालाई कत्ति असर गर्छ त्यो आगामी दिनमा देखिँदै जाला तर प्रसाईँको चर्चा भने निरन्तर बढिरहेको छ । अहिले बैंक र सहकारीको किस्ताले उठिबास भएकाहरू प्रसाईँको सम्पर्कमा पुग्न थालेका छन् । प्रसाईँ माथि लगानी गरेका बैंकहरूले प्रसाईँलाई ऋण तिर्न ताकेता गर्दा उल्टै धम्की खेप्नु पर्छ । अझ कतिपय बैँकले त प्रसाईँको भएको सम्पत्ति भन्दा बढी ऋण लगानी गरेका छन् । प्रसाईँले नै एक कार्यक्रममा बैंकले आफू उभिए ऋण दिन्छन् भनेका थिए । हो उनलाई लगानी गरेका केही बैँकले उनी उभिएकै भरमा ऋण दिएका छन्, जबकी धितो लिलाम गर्दा पनि उनीहरूको ऋण उठ्दैन । त्यसैले उनीहरू प्रसाईँलाई चिढ्याउने भन्दा फकाएर सावाँ फिर्ता गर्न चाहन्छन् तर प्रसाईँ बैंक तथा वित्तिय संस्थाको ज्यादतिबाट आजित भएकाहरूलाई सङ्गठित बनाएर हिँडेका छन् । यसले उनको लोकप्रियता त बढ्छ नै, उनले बोकेको व्यवस्था विरोध मुद्दालाई पनि बल पुर्याउँछ । 

महेश बस्नेत पनि कुनै नागरिकको लागि वा देश भ्रष्टाचारले डुबायो भनेर माइतीघरमा कार्यक्रममा गर्न जान लागेका पक्कै होइनन् । उनको दल नेकपा एमाले वा भनौँ पुराना कांग्रेस, माओवादी सहितका दल र तिनका नेताहरूको राजनीतिक भविष्यमाथि नै खतराका सङ्केतहरू देखिन थालेपछि आक्रामक भएर , अरुलाई गाली गरेर वा मुठभेड गरेरै भएपनि ओझेलमा पर्नु हुँदैन भनेर लागेका हुन् । 

दुर्गा प्रसाईँकै कार्यक्रम बिथोल्न किन खोजिरहेका छन् त रु यसको जवाफ सहज छ स् महेश बस्नेतको बोली, लगभग ओलीकै हो भनेर ।

झापामा दुर्गा प्रसाईँको बढ्दो लोकप्रियताले असर पुर्याउने भनेको केपी ओलीलाई नै हो । महेश बस्नेतको डर झापाबाट निरन्तर चुनाव जित्दै आएका ओलीलाई आगामी निर्वाचनमा प्रसाईँले कुनै पार्टीबाट वा स्वतन्त्र उठेपछि चुनाव प्रभावित पार्न सक्छन् भन्नेमा हो । हुन पनि अहिले महेश बस्नेत हरेक जसो कार्यक्रममा पुगेर स्वतन्त्र जितेका काठमाडौँका मेयर बालेन्द्र शाह, धरानका मेयर हर्क साङपाङ देखि राष्ट्रिय स्वतन्त्र पार्टीको विरोध गरेकै हुन्छन् । 

आवरणमा यि दुवैले जे भने पनि यि दुवैको आन्दोलन व्यक्तिगत स्वार्थ केन्द्रित छ ।

महेश बस्नेत पनि कुनै नागरिकका लागि वा देश भ्रष्टाचारले डुबायो भनेर माइतीघरमा कार्यक्रम गर्न जान लागेका पक्कै होइनन् । उनको दल नेकपा एमाले वा भनौँ पुराना कांग्रेस, माओवादी सहितका दल र तिनका नेताहरूको राजनीतिक भविष्यमा माथि नै खतराका सङ्केतहरू देखिन थालेपछि आक्रामक भएर , अरुलाई गाली गरेर वा मुठभेड गरेरै ओझेलमा पार्नु हुँदैन भनेर लागेका हुन् । 

सुरक्षा चुनौती : मंसिर ७ मा रोकिन सक्छन् प्रसाईँ र बस्नेतका कार्यक्रम 

एकै  दिन एकै ठाउँमा दुई समूहले उस्तै कार्यक्रम गर्न खोजेपछि उपत्यकामा सुरक्षा चुनौति थपिएको सुरक्षा निकायका अधिकारीहरूले विश्लेषण गरेका छन् । बस्नेत र प्रसाईँका पछिल्ला गतिविधि राजनीतिक भन्दा व्यक्तिगत दुश्मनी तहमा देखिएकाले मंसिर ७ गते उनीहरूको लडाइमा सर्वसाधारण पर्न सक्ने भन्दै सुरक्षा निकाय चनाखो बनेका छन् । साथै प्रधानमन्त्री पुष्पकमल दाहाल प्रचण्डले समेत यस विषयमा चासो राखेका छन् । 

बालुवाटार स्रोतका अनुसार शुक्रबार बालुवाटारमा प्रधान सेनापति प्रभुराम शर्मा, नेपाल प्रहरीका प्रमुख वसन्त कुँवर र सशस्त्र प्रहरीका प्रमुख राजु अर्यालसँग  मंसिर ७ गते हुने भनिएका कार्यक्रमलाई लिएर सुरक्षाका विषयमा ब्रिफिङ मागिएको थियो । तीनै जनाले बस्नेत र प्रसाईँको राजनीतिक भन्दा बढी व्यक्तिगत दुश्मनी देखिएको भन्दै दुवै समूहलाई माइतीघर भेट नहुने वातावरण बनाउने तयारी रहेको प्रचण्डलाई जवाफ दिएका थिए ।