लोमान्थाङको छोर्तेनछोमा तीव्रताका साथ पुल निर्माण गरिँदै

मुस्ताङ । उपल्लो मुस्ताङको लोमान्थाङ गाउँपालिकाले वडा नं १ र २ जोड्ने छोर्तेनछोमा तीव्रताका साथ पुल निर्माण भइरहेको छ । गाउँपालिकाको वित्तीय समानीकरण बजेट विनियोजन गरी वडा नं १ र २ सहित झोङ गुफा र निफुक गुम्बा जोड्ने पक्की मोटरेबल पुल निर्माण अन्तिम चरणमा पुगेको हो ।

Watch On

पक्की पुल निर्माणका लागि गाउँपालिकाले गत माघ १० गते माछापुच्छे इञ्जिनियरिङ प्राइभेट लिमिटेडसँग रु ७८ लाख २० हजार आठ ३६ लागतमा ठेक्का सम्झौता गरेको थियो । आगामी माघ १० गतेसम्म पुल सम्पन्न गरिसक्नुपर्ने म्याद निर्धारण गरिएकाले तीव्रताका साथ काम भइरहेको गाउँपालिकाका सबइञ्जिनियर उदय तिमिल्सिनाले जानकारी दिए । उनका अनुसार निर्माणाधीन पुलको भौतिक प्रगति ६० प्रतिशत र वित्तीय प्रगति २० प्रतिशत रहेको छ ।

आठ मिटर लम्बाइ र पाँच मिटर चौडाको पक्की पुल निर्माण भइरहेको बताउँदै तिमिल्सिनाले तोकिएको अवधिमा काम सम्पन्न हुने विश्वास व्यक्त गरे । पुलको दुईतर्फी फाउण्डेसन वालसहित ‘स्लाप’ ढलान अन्तिम चरणमा पुगेको उनले जानकारी दिए । पुल सम्पन्न भएमा कोरलानाका अवलोकन गरी फर्किने पर्यटकलाई छोसेर न्हेचुङस्थित बिओपी क्याम्प तलबाट मानव निर्मित गुफा अवलोकन गर्न सहज हुने गाउँपालिका अध्यक्ष टसीनर्बु गुरुङले बताए ।

पुन बनेपछि वर्षायाममा पनि सवारीसाधन ल्याएर यस क्षेत्रमा सहज तरिकाले पुग्न सकिने उनले बताए । पुल निर्माणले गाउँपालिका कार्यालय केन्द्रबाट वडा नं १ र २ लाई जोड्ने भएकाले स्थानीय नागरिकलाई आवतजावतमा सहज हुने अध्यक्ष गुरुङले विश्वास व्यक्त गरेका छन् । लोमान्थाङ गाउँपालिका–१ र २ को छोसेर गाउँ नेपाल–चीन उत्तरी कोरलानाकाबाट १६ किमी दक्षिणमा पर्दछ । पछिल्लो समय झोङ गुफा अवलोकन गर्न आन्तरिक तथा बाह्य पर्यटक यस क्षेत्रमा पुग्ने गरेका छन् ।