रामहरि खतिवडाको नियुक्ति तत्काल स्थगित गर्न रास्वपाको माग

काठमाडौँ । राष्ट्रिय स्वतन्त्र पार्टीले रामहरि खतिवडालाई संसदीय सुनुवाई समितिको सभापतिमा नियुक्त गरिएकोमा असन्तुष्टि जनाएको छ । रास्वपा संसदीय दलका उपनेता विराजभक्त श्रेष्ठले प्रतिनिधिसभाका सभामुख देवराज घिमिरेलाई पत्र लेख्दै खतिवडालाई संसदीय सुनुवाइ समितिको सभापति जस्तो पदमा नियुक्त गर्दा संसदकै नैतिक आचरणप्रति प्रश्न खडा भएको उल्लेख गरेका छन् ।

Watch On

रामहरि खतिवडा प्रतिनिघिसभा अन्तर्गतको राज्य व्यवस्था तथा सुशासन समितिका सभापति पदमा कार्यरत रहँदा  ‘कुलिङ अफ पिरियड’ सम्बन्धी गडबडीबारे संसदीय छानबिन प्रतिवेदनले दोषी देखिएका थिए । उनलाई कारवाहीका लागि सिफारिस भएपश्चात् उनले सो पदबाट राजीनामा दिएका थिए । 

‘सार्वभौम कानुन निर्माण जस्तो संवेदनशील विषयमा गैरकानुनी रुपमा प्रत्यक्ष संलग्न भई नैतिक संकटमा परी राजीनामा दिनुपरेको व्यक्तिलाई अहिले पुनः संसदीय सुनुवाइ समितिको सभापति जस्तो अझ महत्वपूर्ण पदमा नियुक्त्र गर्ने प्रक्रियाले संसदकै नैतिक आचरणप्रति प्रश्न खडा गरेको छ ।’ पत्रमा भनिएको छ । 

विवादास्पद पृष्ठभूमि भएका व्यक्तिलाई पुनः उच्च ओहदाको जिम्मेवारी दिने कार्यले संसदको गरिमा मात्र नभई सम्पूर्ण लोकतान्त्रिक मूल्य र मान्यतामा आघात पुगेको भन्दै खतिवडाको नियुक्ति तत्काल स्थगित गर्न रास्वपाले माग गरेको छ ।